సత్యారెడ్డిపై విరుచుకుపడుతున్న వైయస్ జగన్ క్యాంప్

హైదరాబాద్‌: వైయస్ జగన్ యువసేనను రద్దు చేస్తున్నట్లు ప్రకటించిన ఆ సంస్థ అధ్యక్షుడు సత్యారెడ్డిపై వైయస్ జగన్ వర్గానికి చెందిన నాయకులు భగ్గుమంటున్నారు. వైయస్ జగన్ యువసేన ఎప్పుడో రద్దయిందని వారంటున్నారు. వైయస్ జగన్ యువసేన పేరు మీద కొల్లి శివారెడ్డి అనే వ్యక్తి తెర మీదికి వచ్చారు. వైయస్ జగన్ పై సత్యారెడ్డి వంటి కుయుక్తులను తిప్పికొడతామని ఆయన అన్నారు. యువకులు వైయస్ జగన్ వెంటే ఉన్నారని ఆయన చెప్పారు. కాంగ్రెసు కుట్రలో భాగంగానే సత్యారెడ్డి వైయస్ జగన్ పై విమర్సలు చేస్తున్నారని నెల్లూరు జిల్లాకు చెందిన నాయకుడు గోపాల్ రెడ్డి విమర్శించారు.

వైయస్ జగన్ యువసేనలంటూ ఏవీ లేవని తిరుపతి పట్టణాభివృద్ధి సంస్థ (తుడా) మాజీ అధ్యక్షుడు చెవిరెడ్డి భాస్కర్ రెడ్డి చెప్పారు. సత్యారెడ్డి వంటి వాళ్లు అటువంటి సంస్థలకు స్వయంప్రకటిత అధ్యక్షులని ఆయన శనివారం తిరుపతిలో అన్నారు. అలాంటి వాళ్ల వల్ల వైయస్ జగన్ కు వచ్చే నష్టమేమీ లేదని ఆయన అన్నారు. ఇటువంటి ప్రయత్నాలను తాము తిప్పికొడతామని ఆయన అన్నారు.