శ్రీకృష్ణ కమిటీ నివేదిక వచ్చిన తర్వాతనే తెలంగాణపై నిర్ణయం: ప్రధాని

న్యూఢిల్లీ: రాష్ట్ర పరిస్థితి అధ్యయనానికి వేసిన శ్రీకృష్ణ కమిటీ నివేదిక వచ్చిన తర్వాతనే తెలంగాణపై నిర్ణయం తీసుకుంటామని ప్రధాని మన్మోహన్ సింగ్ చెప్పారు. తనకు వినతిపత్రం ఇచ్చిన బిజెపి నాయకులతో ఆయన బుధవారం ఈ విషయం చెప్పారు. ప్రజల మనోభావాలను పరిగణనలోకి తీసుకుంటామని, సెంట్ మెంట్ ను గుర్తిస్తామని, ఆ మేరకే తెలంగాణపై నిర్ణయం తీసుకుంటామని ప్రధాని తమతో చెప్పినట్లు బిజెపి సీనియర్ నేత ఎం. వెంకయ్యనాయుడు మీడియా ప్రతినిధులతో చెప్పారు.

కమిటీలతో తెలంగాణ అంశం తేలదని ఆయన అన్నారు. తెలంగాణ రాష్ట్ర ఏర్పాటుకు పార్లమెంటులో బిల్లు పెట్టాలని ఆయన డిమాండ్ చేశారు. తెలంగాణ ఏర్పాటుపై కాంగ్రెసుకు చిత్తశుద్ధి లేదని ఆయన అన్నారు. 2జి స్పెక్ట్రమ్ కుంభకోణంపై ప్రభుత్వం తీరును ఆయన తప్పు పట్టారు. పార్లమెంటులో తెలంగాణ రాష్ట్ర ఏర్పాటుకు బిల్లు ప్రతిపాదించాలని డిమాండ్ చేస్తూ రేపు గురువారం పార్లమెంటు ముందు సత్యాగ్రహం చేస్తామని బిజెపి రాష్ట్రాధ్యక్షుడు జి. కిషన్ రెడ్డి చెప్పారు. అన్ని రాజకీయ పార్టీలు తమతో కలిసి రావాలని ఆయన కోరారు. తెలంగాణపై కాంగ్రెసు, తెలుగుదేశం పార్టీలు స్పష్టమైన వైఖరితో ముందుకు రావాలని ఆయన డిమాండ్ చేశారు. ఈ రెండు పార్టీల వల్లనే తెలంగాణ సమస్య జఠిలం అవుతోందని ఆయన విమర్శించారు.