క్షీణిస్తున్న మందకృష్ణ మాదిగ ఆరోగ్యం: ఆస్పత్రిలోనే దీక్ష కొనసాగింపు

హైదరాబాద్‌: ఎస్సీ వర్గీకరణకు చట్టబద్ధత కల్పించాలని డిమాండ్‌ చేస్తూ మాదిగ రిజర్వేషన్ పోరాట సమితి (ఎమ్మార్పీఎస్‌) నాయకుడు మందకృష్ణ మాదిగ చేపట్టిన ఆమరణ దీక్ష శుక్రవారం ఆరో రోజుకు చేరుకుంది. ఆయన ఆరోగ్యం క్రమంగా క్షీణిస్తోందని వైద్యులు తెలిపారు. సికింద్రాబాద్‌ పార్శీగుట్టలోని ఎమ్మార్పీఎస్‌ రాష్ట్ర కార్యాలయంలో బుధవారం అర్ధరాత్రి మందకృష్ణ దీక్షను పోలీసులు భగ్నం చేసి, ఆయనను గాంధీ ఆసుపత్రికి తరలించిన విషయం తెలిసిందే. ఆసుపత్రిలో మందకృష్ణ వైద్యసేవలను తిరస్కరించి దీక్ష కొనసాగిస్తున్నారు. ఆసుపత్రి వైద్యులు ఆయనను పరీక్షించారు. బీపీ, షుగర్‌ లెవల్స్‌ పడిపోయినట్లు సూపరింటెండెంట్‌ అశోక్‌కుమార్‌ తెలిపారు. మధ్యాహ్న సమయంలో మందకృష్ణ మాట తత్తరగా మారింది. 24 గంటల్లో ఆహారం తీసుకోకుంటే ప్రమాదమని వైద్యులు తెలిపారు.

గాంధీ ఆసుపత్రిలో దీక్ష కొనసాగిస్తున్న మందకృష్ణ మాదిగను గురువారం పలువురు ప్రముఖులు పరామర్శించారు. తెలంగాణ రాజకీయ ఐకాస ఛైర్మన్‌ ప్రొఫెసర్‌ కోదండరాం, తెలంగాణ ప్రజాఫ్రంట్‌ అధ్యక్షుడు గద్దర్‌, తెరాస ఎమ్మెల్యే హరీష్‌రావు, ప్రరాపా పొలిట్‌బ్యూరో సభ్యుడు సి.రామచంద్రయ్య, అధికార ప్రతినిధి గౌతమ్‌, ఎమ్మెల్యేలు లబ్బి వెంకటస్వామి, ఆరేపల్లి మోహన్‌, టీఎన్‌జీవో సంఘం ప్రతినిధి విఠల్‌, మాల సంక్షేమ సంఘం ప్రతినిధి సోమయ్య తదితరులు మందకృష్ణను కలిశారు.