తెలంగాణకు, రచ్చబండకు ముడి పెట్టవద్దు: మంత్రి డిఎల్ రవీంద్రారెడ్డి

కడప\హైదరాబాద్ : తెలంగాణకు రచ్చబండకు ముడి పెట్టవద్దని ఆరోగ్యశాఖ మంత్రి డిఎల్ రవీంద్రారెడ్డి తెలంగాణవాదులను కోరారు. తెలంగాణ అంశం కేంద్రం పరిధిలోనిది అని చెప్పారు. తెలంగాణను కేంద్రమే పరిష్కరిస్తుందని కడప జిల్లాలో సోమవారం చెప్పారు. తెలంగాణకు రచ్చబండకు ముడిపెట్టి రచ్చబండను అడ్డుకోవద్దని కోరారు. ప్రజా సమస్యలను పరిష్కారం కోసం ఏర్పాటు చేసిన రచ్చబండను అడ్డుకోవడం సరికాదన్నారు. తెలంగాణలో కాంగ్రెస్ ప్రజాప్రతినిధులే రచ్చబండను బహిష్కరించడం కూడా సరికాదన్నారు.

ప్రజలకు మేలు చేసే కార్యక్రమాన్ని అడ్డుకోవద్దని రాష్ట్ర హోంమంత్రి సబితా ఇంద్రారెడ్డి విజ్ఞప్తి చేశారు. అన్ని పార్టీ ప్రజాప్రతినిధులు ఈ కార్యక్రమానికి సహకరించాలని ఆమె హైదరాబాదులో కోరారు. సంక్షేమ పథకాల ఫలాలను అందరికీ అందించేందుకే రచ్చబండ కార్యక్రమాన్ని ఏర్పాటుచేసినట్లు వెల్లడించారు.