తెరాసపై మండిపడ్డ డి. శ్రీనివాస్, దౌర్జన్యం చేస్తారా అని నిలదీత

హైదరాబాద్: రచ్చబండ కార్యక్రమాన్ని అడ్డుకుంటున్న తెలంగాణ రాష్ట్ర సమితి (తెరాస) కార్యకర్తలపై ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ మండిపడ్డారు. పేదలకు ఉపయోగపడే రచ్చబండను అడ్డుకుంటారా అని ఆయన అడిగారు. ఇష్టంలేకపోతే కార్యక్రమానికి దూరంగా ఉండాలని, కార్యక్రమాన్ని అడ్డుకోవడం సరి కాదని ఆయన సోమవారం మీడియా ప్రతినిధుల సమావేశంలో అన్నారు. కాంగ్రెసులో ఉండి రచ్చబండ కార్యక్రమాన్ని అడ్డుకోవడం సరి కాదని ఆయన అన్నారు. రచ్చబండ కార్యక్రమంలో తెలంగాణకు అనుకూలంగా తీర్మానం చేయడం తప్పు కాదని ఆయన అన్నారు.

రాళ్లు రువ్వడం గాంధేయవాదమా అని ఆయన అడిగారు. రచ్చబండలో పాల్గొంటున్న నాయకులపై తెరాస కార్యకర్తలు దౌర్జన్యం చేస్తున్నారని ఆయన విమర్శించారు. వరంగల్ జిల్లాలో మంత్రి సారయ్య, పార్లమెంటు సభ్యుడు రాజయ్యలపై తెరాస కార్యకర్తలు దాడులు చేయడాన్ని ఆయన ఖండించారు. తెలంగాణకు కట్టుబడి ఉన్న కాంగ్రెసు నాయకులపై కూడా తెరాస కార్యకర్తలు దౌర్జన్యం చేస్తున్నారని ఆయన విమర్శించారు. తెలుగుదేశం, తెరాస కార్యక్రమాలను అడ్డుకోవద్దని ఆయన కాంగ్రెసు కార్యకర్తలకు సూచించారు. తెరాస అధ్యక్షుడు కెసిఆర్ కార్యక్రమాన్నిఅడ్డుకోవద్దని జగ్గారెడ్డికి ఫోన్ చేసి చెప్పినట్లు ఆయన తెలిపారు.