వైయస్ జగన్ అలిగిన పిల్లాడిలాంటి వాడు: మంత్రి టిజి వెంకటేష్

కర్నూలు: మాజీ పార్లమెంటు సభ్యుడు వైయస్ జగన్ అలిగిన పిల్లవాడి లాంటివాడని, తిరిగి కాంగ్రెసులోకి వస్తాడని రాష్ట్ర లఘు పరిశ్రమల మంత్రి టిజి వెంకటేష్ వ్యాఖ్యానించారు. జగన్ స్థాపించే వైయస్సార్ కాంగ్రెసు వల్ల కాంగ్రెసు పార్టీకి ఏ విధమైన నష్టం లేదని ఆయన శనివారం మీడియా ప్రతినిధుల సమావేశంలో అన్నారు. రాష్ట్రంలో విధ్వంసం సృష్టిస్తున్న తెలంగాణ రాష్ట్ర సమితి (తెరాస)కి చెందిన నేతలను అండమాన్‌లో ఉంచాలని ఆయన అభిప్రాయపడ్డారు. తెరాస నేతలను అండమాన్, తీహార్ జైలులో ఉంచితేనే రాష్ట్రంలో ప్రశాంతత నెలకొంటుందన్నారు.

తెలంగాణ అంశంపై అన్ని పార్టీలకు చెందిన ముఖ్య నేతలతో త్వరలోనే సమావేశం నిర్వహించనున్నట్టు చెప్పారు. రాజకీయాలకు అతీతంగా ఈ సమస్యపై చర్చించడం ద్వారానే పరిష్కార మార్గం కనుగొనగలమన్నారు. తెలంగాణ ఉద్యమం ఆరిపోయే దీపంలాంటిదని ఆయన అన్నారు. అన్ని పార్టీలకు చెందిన ముఖ్యనేతలు, శాసనసభ్యులు కలిసి చర్చించి తెలంగాణ సమస్యకు పరిష్కారం కనుక్కోవాలని ఆయన అన్నారు. మిలియన్ మార్చ్‌కు పది లక్షల మంది వస్తారని కెసిఆర్ చెప్పారని, పది వేల మంది కూడా రాకపోవడంతో విధ్వంసానికి ఉసిగొల్పారని ఆయన విమర్శించారు.

English summary

Small scale industries minister TG Venkatesh said that YS Jagan will join into Congress again. He lashed out at TRS leaders for attacking statues on Tank bund in Hyderabad.