శ్రీకృష్ణ కమిటీ సీమాంధ్రకు అమ్ముడు పోయింది: హరీష్‌ రావు

హైదరాబాద్: శ్రీకృష్ణ కమిటీ సీమాంధ్ర పెత్తనందారులకు అమ్ముడు పోయిందని తెలంగాణ రాష్ట్ర సమితి సీనియర్ శాసనసభ్యుడు హరీష్‌రావు గురువారం అసెంబ్లీలోని మీడియా పాయింట్ వద్ద విలేకరులతో మాట్లాడుతూ ఆరోపించారు. శ్రీకృష్ణది శకుని పాత్ర అన్నారు. ఇప్పటికైనా కేంద్రం కళ్లు తెరవాలని అన్నారు. హైకోర్టు శ్రీకృష్ణ కమిటీని ప్రశ్నించిన తర్వాత కేంద్రం కళ్లు తెరిచి కమిటీలు అంటూ కాలాయాపన చేయవద్దని డిమాండ్ చేశారు. సీమాంధ్రులు తెలంగాణ ఉద్యమాన్ని తొక్కి పెట్టడంతో పాటు జస్టిస్ శ్రీకృష్ణను ప్రభావితం చేశారని అన్నారు.

కేంద్రం తెలంగాణకు అనుకూలంగా నిర్ణయం తీసుకోకుంటే ఏం జరిగినా మా బాధ్యత లేదన్నారు. తెలంగాణ డెవలప్‌మెంట్ ఫోరం శ్రీకృష్ణ కమిటీ నివేదికలోని తప్పులను పూసగుచ్చినట్లు చెప్పిందన్నారు. తెలంగాణ విద్యుత్ ఉద్యోగుల సంఘం కూడా కమిటీ నివేదిక తప్పుల తడకను బయట పెట్టిందన్నారు. నివేదికలో తెలంగాణ ప్రజల మనోభావాలు కనిపించలేదన్నారు.

సీమాంధ్ర పెట్టుబడిదారులకు శ్రీకృష్ణ కమిటీ అమ్ముడు పోయిందన్నారు. సీమాంధ్రులకు అమ్ముడు పోయిన శ్రీకృష్ణ కమిటీ నివేదికను ఇంతటితో వదిలేసిది లేదన్నారు. వారిపై చర్యలు తీసుకునే వరకు పోరాడుతామని చెప్పారు. శ్రీకృష్ణ కమిటీ రిపోర్టులో అన్ని తప్పులే అని హైకోర్టు వ్యాఖ్యలతో తెలిసిందన్నారు. టిఆర్ఎస్ కాంగ్రెసులో విలీనం అయ్యే ప్రసక్తి లేదన్నారు.

English summary

TRS senior MLA Harish Rao said today that Srikrishna Committee report is seemandhra report. He opposed TRS merger in Congress.