ముఖ్యమంత్రిపై నో కామెంట్, జగన్ - చంద్రబాబుల మధ్యే సవాళ్లు: రోశయ్య

By Srinivas

Published: Tuesday, May 31, 2011, 13:52 [IST]

న్యూఢిల్లీ: తెలుగుదేశం పార్టీ, వైయస్ఆర్ కాంగ్రెసు పార్టీ ఏ పార్టీ ముఖ్యమంత్రి కిరణ్ కుమార్ రెడ్డి ప్రభుత్వంపై అవిశ్వాసం పెట్టినా ప్రభుత్వానికి ఎలాంటి ఢోకా లేదని మాజీ ముఖ్యమంత్రి కొణిజేటి రోశయ్య మంగళవారం న్యూఢిల్లీలో విలేకరులతో మాట్లాడుతూ చెప్పారు. చంద్రబాబు, జగన్ ఇద్దరూ అవిశ్వాస తీర్మానంపై కేవలం వారిలో వారే సవాలు విసురుకుంటున్నారన్నారు. అవిశ్వాసం పెడితే నెగ్గే సత్తా ఉందని కిరణ్ కుమార్ రెడ్డి కూడా స్పష్టం చేశారని అన్నారు. ముఖ్యమంత్రి రోశయ్యపై మాజీ ముఖ్యమంత్రి నేదురుమల్లి జనార్దన్ రెడ్డి చేసిన వ్యాఖ్యలపై తానేమీ స్పందించనన్నారు. తనకు ఎవరితో విభేదాలు లేవని, అలాగే ఫిర్యాదులు లేవని చెప్పారు.

తనకు గవర్నర్ పదవి వస్తుందన్న వార్తలు కేవలం మీడియాలో వస్తున్న కథనాలు అని ఆయన కొట్టి పారేశారు. తనకు ఏ పదవో ఇవ్వడానికి అధిష్టానం పిలవలేదు, తనకు పదవి ఇవ్వమని కోరడానికి తాను గానీ ఢిల్లీ రాలేదన్నారు. తనకు పార్టీలో ప్రాధాన్యత కల్పించినందుకు కృతజ్ఞలు చెప్పుకునేందుకే వచ్చానన్నారు. ఇటీవల ఐదు రాష్ట్రాల ఎన్నికలు పూర్తవడంతో ఏఐసిసి అధ్యక్షురాలు సోనియాగాంధీ రిలీఫ్‌గా ఉంటారని కలవడానికి వచ్చానన్నారు. పార్టీ అధిష్టానానికి రాసిన లేఖలో పార్టీ బలోపేతం చేయాల్సిన అవసరాన్ని సూచించానని చెప్పారు. రాష్ట్రంలో ప్రస్తుత పరిస్థితిపై సోనియాతో చర్చిస్తానని చెప్పారు. కాగా ఆయన మధ్యాహ్నం సోనియాగాంధీతో సమావేశం అయ్యారు.

Published On May 31, 2011