మంత్రులు సహా 47 మంది రాజీనామాలకు రెడీ

By Srinivas

Published: Monday, July 4, 2011, 10:59 [IST]

హైదరాబాద్: సుమారు 26 మంది శాసనసభ్యులు, 12 మంది మంత్రులు, 9 మంది పార్లమెంటు సభ్యులు రాజీనామాకు సిద్దపడ్డట్టు తెలుస్తోంది. గ్రేటర్ మంత్రులు దానం నాగేందర్, ముఖేష్ గౌడ్‌తో పాటు ఉప ముఖ్యమంత్రి దామోదర రాజనర్సింహ రాజీనామా చేయడం లేదు. మల్కాజిగిరి పార్లమెంటు సభ్యుడు సర్వే సత్యనారాయణ కూడా రాజీనామాకు సిద్దంగా లేనట్లు తెలుస్తోంది. ఇక రాజీనామా చేస్తున్న మంత్రులలో రాంరెడ్డి వెంకటరెడ్డి, శ్రీధర్ బాబు, సునీతా లక్ష్మారెడ్డి, గీతారెడ్డి, డికె అరుణ, సబితా ఇంద్రారెడ్డి, జానారెడ్డి, కోమటిరెడ్డి వెంకటరెడ్డి, బస్వరాజు సారయ్య, పొన్నాల లక్ష్మయ్య, శంకర్ రావు, సుదర్శన్ రెడ్డి ఉండగా ఎంపీలు పొన్నం ప్రభాకర్, వివేక్, రాజయ్య, గుత్తా సుఖేందర్ రెడ్డి, మందా జగన్నాథం, సురేష్ షేట్కార్, బలరాం నాయక్, రాజ్యసభ ఎంపీ కె కేశవరావుతో పాటు మరో 26 మంది శాసనసభ్యులు రాజీనామా చేయనున్నారు. కాగా హోంమంత్రి సబితా ఇంద్రారెడ్డి రాజీనామాపై ఊగిసలాటలో ఉన్నట్టుగా సమాచారం.

జూబ్లీహిల్స్ శాసనసభ్యుడు పి.విష్ణువర్దన్ రెడ్డి ఇచ్చిన రాజీనామా పత్రం సరిగా లేనందున ఆయన రాజీనామా ఆమోదించలేదని తెలుస్తోంది. అయితే ఆయన మరో రాజీనామా ఇవ్వడానికి సిద్ధపడ్డట్టు తెలుస్తోంది. కాగా మంత్రులు ఎవరూ గవర్నర్ అపాయింటుమెంట్ కోరలేదని గవర్నర్ కార్యాలయ వర్గాలు చెబుతున్నాయి. వైయస్సార్ కాంగ్రెసు పార్టీ అధ్యక్షులు వైయస్ జగన్ క్యాంప్ కాంగ్రెసు శాసనసభ్యురాలు కొండా సురేఖ సైతం రాజీనామా చేశారు. తాను వ్యక్తిగత కారణాలతోనే రాజీనామా చేస్తున్నట్టు చెప్పారు. నిజామాబాద్ ఎంపీ మధుయాష్కీ అమెరికా నుండి ఫాక్సులో తన రాజీనామా లేఖను పంపారు.

Published On July 4, 2011