ప్రాణాలు మాకు లెక్క కాదు, సమైక్యాంధ్రే: శైలజానాథ్

By Srinivas

Published: Thursday, July 28, 2011, 12:59 [IST]

చిత్తూరు: ప్రాణాలు, పదవులు తమకు ముఖ్యం కాదని సమైక్యాంధ్రనే ముఖ్యమని మంత్రి సాకే శైలజానాథ్ గురువారం చిత్తూరు జిల్లాలో అన్నారు. సమైక్యాంధ్ర కోసం పదవులే కాదు ప్రాణత్యాగానికి సిద్ధమని అన్నారు. సమైక్యాంధ్ర, తెలంగాణ విషయంలో తెలుగుదేశం పార్టీ అధ్యక్షుడు నారా చంద్రబాబు నాయుడు, వైయస్సాఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి తమ వైఖరిని ప్రకటించాలని డిమాండ్ చేశారు. సమైక్యాంధ్ర కోసం మా ఎత్తుగడలు మాకు ఉన్నాయన్నారు. తెలంగాణ విషయంలో కేంద్రం ఏకపక్ష నిర్ణయం తీసుకోదని తాము భావిస్తున్నామని అన్నారు.

సమైక్యాంధ్ర కోసం దేనికైనా సిద్ధంగా ఉన్నామన్నారు. కేంద్రం తెలంగాణ ఇస్తామని ఎప్పుడూ చెప్పలేదన్నారు. తెలంగాణ అంశంపై కొందరు ఉద్దేశ్య పూర్వకంగా తెలంగాణ ప్రజలను రెచ్చగొడుతున్నారని ఆరోపించారు. సమైక్యాంధ్ర కోసం అధిష్టానం తమను ఎప్పుడు పిలిస్తే అప్పుడు వెళతామని చెప్పారు. సీమాంధ్ర వారు అందరూ సమైక్యాంధ్రనే కోరుకుంటున్నారని అన్నారు.

Published On July 28, 2011