'పరిటాల అనుచరుల నుండి వైయస్ జగన్‌కు హానీ'

By Srinivas

Published: Friday, August 5, 2011, 8:59 [IST]

కడప: దివంగత తెలుగుదేశం పార్టీ నేత పరిటాల రవి అనుచరులైన పోతుల సురేష్, చమన్‌ల నుండి వైయస్సాఆర్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డికి ప్రాణహాని ఉందని మాజీ మంత్రి మారెప్ప గురువారం అనుమానాలు వ్యక్తం చేశారు. సిబిఐ సంస్థ కాంగ్రెసు పార్టీ జేబు సంస్థ అని ఆ సిబిఐ ద్వారా వైయస్ జగన్‌ను జైలుకు పంపే కుట్ర చేస్తున్నారని ఆయన ఆరోపించారు. ఒకవేళ వారి కుట్ర ఫలించినా వైయస్సాఆర్సీ పార్టీకి పులివెందుల శాసనసభ్యురాలు వైయస్ విజయమ్మ సారథ్యం వహిస్తారని జగన్ చేస్తున్న ఓదార్పు సైతం ఆగిపోదని అన్నారు.

జగన్ తరఫున విజయమ్మతో ఓదార్పు యాత్ర చేపడతామని అన్నారు. ఆదర్శ్, 2జి కుంభకోణాలు యుపిఐ హయాంలోనే జరిగాయని అందుకు బాధ్యురాలిని చేస్తూ ముందుగా ఏఐసిసి అధ్యక్షురాలు సోనియాగాంధీని అరెస్టు చేయాలని డిమాండు చేశారు. గతంలో తెలుగుదేశం పార్టీ అధ్యక్షుడు చంద్రబాబు నాయుడుపై సిబిఐ విచారణకు ఆదేశించగా ఆయన కోర్టుకు వెళ్లి స్టే తెచ్చుకున్నారని అందుకు ఆయనను సైతం అరెస్టు చేయాలని డిమాండ్ చేశారు.

Published On August 5, 2011