అవును బాధ్యులమే.. కానీ: శంకర్‌రావు వ్యాఖ్యలపై బొత్స

By Srinivas

Published: Sunday, August 14, 2011, 16:36 [IST]

హైదరాబాద్: వైయస్సాఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి ఆస్తులు, ఎమ్మార్ అక్రమాలపై విచారణలో నాటి వైయస్ రాజశేఖర రెడ్డి మంత్రివర్గాన్ని సైతం విచారణ జరిపించాలన్న చేనేత జౌళీ శాఖ మంత్రి శంకర్ రావు వ్యాఖ్యలపై పలువుర కాంగ్రెసు నేతలు వివిధ రకాలుగా స్పందించారు. ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ మాట్లాడుతూ శంకర్ రావు చెప్పినట్లు నాటి నిర్ణయాల్లో ఖచ్చితంగా మంత్రివర్గానికి సంబంధం ఉంటుందని అన్నారు. అయితే తెరచాటు జరిగే నిర్ణయాలకు మంత్రివర్గం బాధ్యత వహించదని చెప్పారు. తెరచాటు వెనుక సైతం ఎవరైనా మంత్రులు ఉంటే దానికి బాధ్యత వహించాల్సిందేనని చెప్పారు. తప్పు చేసిన వారికి శిక్ష పడాల్సిందే అన్నారు.

అనంతపురం జిల్లా సీనియర్ నాయకుడు జెసి దివాకర్ రెడ్డి మాట్లాడుతూ... శంకర్ రావు ఏ ఉద్దేశ్యంతో సిబిఐకి లేఖ రాశారో తనకు తెలియదన్నారు. అది తెలుసుకున్న తర్వాత ఏమైనా మాట్లాడవచ్చునని చెప్పారు. నాటి మంత్రివర్గంలో ఉన్నా వారిగా సిబిఐ విచారణకు హాజరు కావడానికి సిద్ధంగా ఉన్నామని చెప్పారు. శంకర్ రావు వ్యాఖ్యలను ఆహ్వానిస్తున్నట్లు మరో మంత్రి రఘువీరా రెడ్డి చెప్పారు. మంచి జరిగినా చెడు జరిగినా నిర్ణయాలకు మంత్రివర్గం బాధ్యత వహించాల్సిందే అని చెప్పారు. నిర్ణయాలకు వైయస్ ఎంత బాధ్యుడో నాటి మంత్రులు సైతం అంతే బాధ్యులన్నారు.

Published On August 14, 2011