ఎమ్మార్ పాపం అంబటిదే!: శివ సుబ్రహ్మణ్యం

By Srinivas

Published: Tuesday, September 6, 2011, 19:43 [IST]

తిరుపతి: ఎమ్మార్ కుంభకోణం నైతికంగా నాటి చైర్మన్, ప్రస్తుత వైయస్సార్సీ పార్టీ అధికార ప్రతినిధి అంబటి రాంబాబు ముద్దాయే అని ఎపిఐఐసి చైర్మన్ శివ సుబ్రహ్మణ్యం మంగళవారం తిరుపతిలో అన్నారు. ఎమ్మార్‌లో అంబటి సోదరుడికి కూడా విల్లా ఉందని ఆరోపించారు. ఎమ్మార్ కుంభకోణం ఆయన హయాంలోనే జరిగిందన్నారు. అంబటికి తెలియకుండా ఈ కుంభకోణం జరిగిందనుకోమన్నారు. ఎమ్మార్ కుంభకోణంతో సంబంధం ఉన్న మంత్రులు, అధికారులపై విచారణ జరగాల్సి ఉందన్నారు. బిపి ఆచార్య కేవలం పావు మాత్రమే అన్నారు. అసలు తిమింగలాలు బయటకు రావాల్సి ఉందన్నారు.

అంబటి హయాంలో బోర్డు దృష్టికి రాకుండానే కేటాయింపులు జరిగాయన్నారు. ఎమ్మార్‌కు పునాదులు వేసింది తెలుగుదేశం పార్టీ అధ్యక్షుడు నారా చంద్రబాబు నాయుడు అన్నారు. ఎమ్మార్ కుంభకోణం విషయంలో మనీలాండరింగ్ చట్టం కింద కోర్టులో కౌంటర్ దాఖలు చేస్తామని శివసుబ్రహ్మణ్యం చెప్పారు. వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి సిబిఐ దర్యాఫ్తుకు సహకరించి తన నిజాయితీ నిరూపించుకోవాలని సూచించారు.

Published On September 6, 2011