గాలి సొమ్ము, పత్రాలు హైదరాబాదుకు తరలింపు

By Pratap

Published: Tuesday, September 6, 2011, 14:34 [IST]

హైదరాబాద్: కర్ణాటకలోని బళ్లారి, బెంగళూర్ సోదాల్లో స్వాధీనం చేసుకున్న గాలి జనార్దన్ రెడ్డి, శ్రీనివాస రెడ్డిలకు చెందిన సొమ్మును, పత్రాలను సిబిఐ అధికారులు మంగళవారం హైదరాబాదుకు తరలించారు. మొత్తం మూడు వాహనాల్లో వాటిని హైదరాబాదుకు తరలించారు. సిబిఐ సోదాల్లో భారీగా బంగారం, నగదు లభ్యమైనట్లు, అలాగే కీలకమైన పత్రాలు దొరికినట్లు చెబుతున్నారు. సిబిఐ స్వాధీనం చేసుకున్నవాటిలో భారీగా బంగారం ఉన్నట్లు తెలుస్తోంది. వారి సొమ్ముకు సంబంధించిన సమాచారాన్ని సిబిఐ ఆదాయం పన్ను శాఖ అధికారులకు తెలియజేసింది.

రాష్ట్ర ప్రభుత్వం నుంచి గనుల తవ్వకానికి గాలి జనార్దన్ రెడ్డి ఆరు సంస్థల పేరు మీద 2007లో అనుమతి పొందారు. అయితే, గాలి జనార్దన్ రెడ్డి గనుల తవ్వకాల్లో పలు అక్రమాలకు పాల్పడినట్లు ఆరోపణలున్నాయి. సిబిఐ అధికారులు నాలుగు ల్యాప్‌ట్యాప్‌లను కూడా స్వాధీనం చేసుకున్నట్లు తెలుస్తోంది. హైదరాబాదులో ఉన్న గాలి జనార్దన్ రెడ్డిని మంగళవారంనాడు వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గానికి చెందిన కాంగ్రెసు శాసనసభ్యుడు కాపు రామచంద్రా రెడ్డి కలిశారు.

Published On September 6, 2011