గాలి జనార్దన్ రెడ్డి, జగన్ లింక్‌లపై సిబిఐ ఆరా

By Pratap

Published: Tuesday, September 6, 2011, 19:38 [IST]

హైదరాబాద్: అక్రమ మైనింగ్ కేసులో అరెస్టయిన కర్ణాటక మాజీ మంత్రి గాలి జనార్దన్ రెడ్డికి, వైయస్సార్ కాంగ్రెసు పార్టీ అధ్యక్షుడు వైయస్ జగన్‌కు మధ్య గల సంబంధాలపై సిబిఐ అధికారులు ఆరా తీస్తున్నారు. గాలి జనార్దన్ రెడ్డితో తనకు ఏ విధమైన సంబంధం లేదని వైయస్ జగన్ ప్రకటించారు. అయితే, జగన్ ఆస్తుల కేసును, గాలి జనార్దన్ రెడ్డి అక్రమ మైనింగ్ కేసును దర్యాప్తు చేస్తున్న సిబిఐ మాత్రం వారిద్దరి మధ్య గల వ్యాపార సంబంధాలపై దృష్టి పెట్టింది.

కడప జిల్లాలో తలపెట్టిన గాలి జనార్దన్ రెడ్డి బ్రాహ్మణి స్టీల్స్‌ వ్యవహారాలను కూడా సిబిఐ పరిశీలిస్తోంది. వైయస్ రాజశేఖర రెడ్డి ప్రభుత్వ హయాంలో ఆ కర్మాగార స్థాపనకు గాలి జనార్దన్ రెడ్డికి 10,675 ఎకరాల భూమిని కేటాయించారు. ఇటు జగన్ రెడ్డితోనూ, అటు గాలి జనార్దన్ రెడ్డితోనూ సంబంధాలు పెట్టుకున్న ఆర్ఆర్ గ్లోబల్ వ్యవహారాలను కూడా పరిశీలిస్తోంది. గాలి జనార్దన్ రెడ్డికి చెందిన ఓబుళాపురం మైనింగ్ కంపెనీ నుంచి ఆర్ఆర్ గ్లోబల్ సబ్ కాంట్రాక్టు పొందింది. ఆర్ఆర్ గ్లోబల్ నుంచి జగన్‌కు చెందిన సాక్షి దినపత్రికలోకి పెద్ద యెత్తున నిధులు చేరాయి. ఈ సంబంధమే బ్రాహ్మణి స్టీల్స్‌పై సిబిఐ దృష్టి సారించడానికి కారణమని అంటున్నారు.

Published On September 6, 2011