వైయస్ జగన్‌కు సవాల్ విసిరిన నామా నాగేశ్వర రావు

న్యూఢిల్లీ: అక్రమాలకు పాల్పడలేదనే వైయస్సార్ కాంగ్రెసు అధ్యక్షుడు వైయస్ జగన్ ప్రకటనపై తెలుగుదేశం పార్లమెంటరీ పార్టీ నాయకుడు నామా నాగేశ్వర రావు తీవ్రంగా ధ్వజమెత్తారు. తనతో జాతీయ చానెల్ ముందుకు చర్చకు వస్తే అక్రమాలను నిరూపించడానికి తాను సిద్ధంగా ఉన్నానని, అందుకు వైయస్ జగన్ సిద్ధపడాలని ఆయన సవాల్ విసిరారు. జగన్ నిజాలను అంగీకరించి, నిజాయితీని నిరూపించుకోవాలని ఆయన డిమాండ్ చేశారు. గాలి జనార్దన్ రెడ్డితో జగన్‌కు సంబంధాలున్నాయని ఆయన మంగళవారం మీడియా ప్రతినిధులతో అన్నారు. ఓబుళాపురం మైనింగ్ కంపెనీలో జగన్‌కు వాటా ఉందని ఆయన ఆరోపించారు. సాక్షి దినపత్రికలో పెట్టుబడులు పెట్టిన ఆర్ఆర్ గోల్డ్ సాక్షి కార్యాలయంలోనే ఉందని, అది ఒఎంసి వద్ద సబ్ కాంట్రాక్టును పొందిందని ఆయన అన్నారు.

పట్టపగలు దొంగతనం చేసి దొంగ ఉరుకుతున్నాడనే పద్ధతిలో జగన్ వ్యవహరిస్తున్నారని ఆయన వ్యాఖ్యానించారు. పట్టపగులు నిట్టనిలువు జగన్ దోపిడీకి చేశారని ఆయన ఆరోపించారు. జగన్ తప్పు అంగీకరించి లెంపలేసుకోవాలని ఆయన అన్నారు. జగన్ అస్తులు స్వల్పకాలంలో అంతగా ఎలా పెరిగాయని ఆయన అడిగారు. ఖాతాలను మీడియా ముందు పెడదామని, తాను అక్రమాలను రుజువులతో సహా నిరూపిస్తానని, అందుకు జగన్ ముందుకు రావాలని ఆయన అన్నారు. అవినీతికి పాల్పడినవారిని ప్రజలు రాళ్లతో కొట్టాలని ఆయన అన్నారు.

English summary

TDP MP Nama Nageswar Rao challenged YSR Congress party president YS Jagan.