రాయపాటి సాంబశివరావు వర్సెస్ నాగం జనార్దన్ రెడ్డి

గుంటూరు/హైదరాబాద్: తెలంగాణ అంశం కాంగ్రెసు సీమాంధ్ర పార్లమెంటు సభ్యుడు రాయపాటి సాంబశివ రావు వర్సెస్ తెలంగాణ నగారా నేత నాగం జనార్దన్ రెడ్డిగా మారింది. ఓపిక నశిస్తే హైదరాబాదులోని సీమాంధ్ర ప్రజలు రోడ్ల మీదికి వస్తారని, అప్పుడు మీరంతా ఎటు వెళ్తారని రాయపాటి సాంబశివ రావు శనివారం గుంటూరులో అన్నారు. ఉస్మానియా విశ్వవిద్యాలయం విద్యార్థులు, వరంగల్, కరీంనగర్ వాళ్లు తప్ప మిగతా తెలంగాణవాళ్లు తెలంగాణ రాష్ట్రాన్ని కోరుకోవడం లేదని ఆయన అన్నారు. ఐదు నుంచి పది తరగతులు చదువుతున్న పిల్లలను తెలంగాణవాళ్లు రోడ్ల మీదికి తెచ్చి డ్యాన్సులు చేయించడం మంచిది కాదని ఆయన అన్నారు.

రాయపాటి సాంబశివరావుపై నాగం జనార్దన్ రెడ్డి భగ్గుమన్నారు. దమ్ముంటే రాయపాటి సాంబశివ రావు తెలంగాణలో బస్సుయాత్ర చేపట్టాలని సవాల్ చేశారు. ఒకప్పుడు దివాళా తీసిన రాయపాటి సాంబశివరావు తెలంగాణ భూములను ఆక్రమించుకుని గట్టెక్కారని ఆయన హైదరాబాదులో ఆరోపించారు. రాయపాటి ఆస్తులపై సిబిఐ విచారణ జరిపించాలని ఆయన డిమాండ్ చేశారు. తెలుగుదేశం పార్టీ అధ్యక్షుడు నారా చంద్రబాబు నాయుడు ముమ్మాటికి సమైక్యవాదేనని ఆయన అన్నారు. తెలుగుదేశం తెలంగాణ నాయకులు చంద్రబాబుకు చెంచాలుగా మారారని ఆయన వ్యాఖ్యానించారు. తెలంగాణపై పిసిసి అధ్యక్షుడు బొత్స సత్యనారాయణ డ్రామాలు ఆడుతున్నారని ఆయన విమర్శించారు.

English summary

Telangana Nagara leader Nagam Janardhan Reddy retaliated Congress Seemandhra MP Rayapati Sambasiva Rao.