ఇవ్వకుంటే లాక్కుంటా: జెసి సోదరుడు ప్రభాకర్ రెడ్డి

By Srinivas

Published: Monday, September 26, 2011, 14:09 [IST]

అనంతపురం: జిల్లా కాంగ్రెసు పార్టీ శాసనసభ్యుడు జెసి దివాకర్ రెడ్డి సోదరుడు జెసి ప్రభాకర్ రెడ్డి పార్టీ అధిష్టానానికి సోమవారం ఆల్టిమేటం జారీ చేశారు. తనకు ఈసారి అధిష్టానం అనంత పార్లమెంటు సీటు ఇవ్వాలని లేదంటే తానే లాక్కుంటానని హెచ్చరించారు. తాను ఎప్పుడు అనంతపురం ఎంపీ సీటు అడిగినా అధిష్టానం సిట్టింగు బూచి చూపిస్తోందన్నారు. సిట్టింగులు ఏం పొడిచారన్నారు. ఈ సారి తాను పోటీ చేయడం తప్పదన్నారు. దివంగత ముఖ్యమంత్రి వైయస్ రాజశేఖర రెడ్డి బతికి ఉంటే తమకు ఇన్ని కష్టాలు వచ్చి ఉండేవి కావన్నారు. ప్రదేశ్ కాంగ్రెసు కమిటీ అధ్యక్ష పదవి తీసుకోవాలంటే అందుకు దమ్ముండాలన్నారు. కార్యకర్తల బలం లేని వారికి పదవులు ఇస్తున్నారని ఆరోపించారు. పని చేసే వారికే పదవులు ఇవ్వాలని డిమాండ్ చేశారు.

కాగా అంతకుముందు అనంతపురంలో కాంగ్రెసు పార్టీ జిల్లా కార్యవర్గం సమావేశమయింది. ఈ సమావేశంలో మంత్రి రఘువీరా రెడ్డి, జెసి దివాకర్ రెడ్డి వర్గం మధ్య తీవ్ర వాగ్యుద్దం చోటు చేసుకుంది. జెసి దివాకర్ రెడ్డి వచ్చినప్పుడు జెసి వర్గీయులు జెసికి అనుకూలంగా నినాదాలు చేశారు. మంత్రి రఘువీరా రెడ్డి అనుచరులు, శైలజానాథ్ అనుచరులు సైతం ఆలాగే నినాదాలు చేశారు. దీంతో ఇరువర్గాల మధ్య ఉద్రిక్త పరిస్థితి నెలకొంది.

Published On September 26, 2011