కనకమ్మ దుర్గమ్మపై పుకార్లతో భయంతో నిద్రకు దూరం

విజయవాడ: బెజవాడ కనకదుర్గమ్మ ముక్కు పుడక జారిపడిపోయిందని, దాని వల్ల అరిష్టమని పెద్ద యెత్తున పుకార్లు వ్యాపించడంతో ప్రజలు తీవ్ర భయాందోళనలకు గురయ్యారు. బెజవాడ కనకదుర్గమ్మ ముక్కుపుడక జారిపోవడం వల్ల నిద్రపోతే చనిపోతారని ప్రచారం జరిగింది. దీంతో నల్లగొండ, గుంటూరు జిల్లాల్లోని కొన్ని ప్రాంతాల ప్రజలు రాత్రంతా వీధుల్లోనే నిద్ర లేకుండా కాలం గడిపారు. కృష్ణా నది పరీవాహక ప్రాంతంలో ఆ పుకార్లు వ్యాపించాయి. గుంటూరు జిల్లాలోని మాచర్ల, దాచేపల్లి తదితర ప్రాంతాల్లో, నల్లగొండ జిల్లాలోని నేరేడుచర్ల వంటి ప్రాంతాల్లో ఆ పుకార్లు వ్యాపించాయి.

ఇప్పటికే ఓ హాస్టల్లో పది మంది విద్యార్థులు చనిపోయారని, భూకంపం వస్తుందని ప్రచారం జరిగింది. ఈ అశుభం నుంచి బయటపడడానికి మహిళలకు పసుపు, కుంకుమలు, వస్త్రాలు ప్రదానం చేసినట్లు కూడా ప్రచారం జరిగింది. అయితే, వదంతులను నమ్మవద్దని బెజవాడ కనకదుర్గమ్మ ఆలయం కార్యనిర్వాహక అధికారి చెప్పారు. ఈ వందతులను జనవిజ్ఞాన సమితి కొట్టిపారేసింది. వందతులు నమ్మవద్దని విజ్ఞప్తి చేసింది.

English summary

As a rumor spread on Bezawada Kanakadurgamma, people felt panic in Nalgonda and Guntur districts.