విరమణ దిశగా తెలంగాణ సకల జనుల సమ్మె

హైదరాబాద్: నెల రోజులకు పైగా దాటిన తెలంగాణ సకల జనుల సమ్మె క్రమక్రమంగా విరమణ దిశగా అడుగులు వేస్తోంది. రాజకీయ నాయకులు సంఘీభావానికి మాత్రమే పరిమితం కావడం, సమ్మె బరువునంతా తామే మోయాల్సి వస్తుండడంతో విసిగిపోయిన వర్గాలు సమ్మెకు క్రమక్రమంగా స్వస్తి చెబుతున్నాయి. ఇప్పటికే ఆర్టీసి కార్మికులు సమ్మెను విరమించుకోగా, తాజాగా సోమవారం తెలంగాణలోని ప్రైవేట్ విద్యాసంస్థల యాజమాన్యాలు కూడా సమ్మెను విరమించాయి. విద్యార్థుల భవిష్యత్తును దృష్టిలో పెట్టుకుని తాము సమ్మె విరమిస్తున్నట్లు ప్రైవేట్ విద్యాసంస్ధల యాజమాన్యాలు ప్రకటించాయి. మంగళవారం నుంచి తెలంగాణలోని విద్యాసంస్థలు తిరిగి ప్రారంభం కానున్నాయి. సమ్మె కాలంలో విద్యార్థులు 12 రోజుల విద్యను మాత్రమే నష్టపోయారని టీచర్స్ జెఎసి నాయకులు అంటున్నారు.

కాగా, తెలంగాణ టీచర్స్ జెఎసి కూడా సమ్మె విరమణ దిశగా అడుగులు వేస్తోంది. టీచర్స్ జెఎసి నాయకులు మంత్రి పార్థసారథితో చర్చలు జరిపారు. సింగరేణి కార్మికులు కూడా సమ్మె విరమణకు యాజమాన్యంతో చర్చలు ప్రారంభించారు. చర్చలు కొలిక్కి అవకాశం ఉంది. తెలంగాణ ఉద్యోగులు కూడా సమ్మెను విరమించే అవకాశం ఉంది. రాజకీయ నేతల తీరు పట్ల తెలంగాణ ఉద్యోగుల జెఎసి నాయకుడు స్వామి గౌడ్ ఒకటి, రెండు సార్లు నిరసన వ్యక్తం చేశారు. బరువంతా తమ మీద మోపి, రాజకీయ నాయకులు డ్రామాలు చేస్తున్నారని ఆయన విమర్శించారు. ఈ స్థితిలో తెలంగాణ స్టీరింగ్ కమిటీ సోమవారం సాయంత్రం సమావేశమైంది. నవంబర్ మొదటి వారంలో తెలంగాణ మార్చ్ చేపట్టాలని జెఎసి నిర్ణయించింది. ఈ నెల 25వ తేదీ నుంచి హైదరాబాదులోని ఇందిరాపార్కు వద్ద ప్రజాప్రతినిధులు సామూహిక ధర్నాలు చేయనున్నారు.

సమ్మె కాలాన్ని ప్రత్యేక సెలవులుగా ప్రకటిస్తే సింగరేణి కార్మికులు సమ్మెను వాయిదా వేసుకునే అవకాశం ఉంది. కాగా, మంత్రి పార్థసారథితో చర్చలను రెండు తెలంగాణ ఉపాధ్యాయ సంఘాలు బహిష్కరించాయి. టిఆర్‌టియు, డిటిఎఫ్ మంత్రితో సోమవారంనాటి చర్చలను బహిష్కరించాయి.

English summary

Telangana Sakala Janula Samme may be withdrawn in Phased manner.