ఎక్కడైనా పోటీ చేస్తాం: కెసిఆర్‌కు చంద్రబాబు సవాల్

హైదరాబాద్: భవిష్యత్తులో తాము ఎక్కడి నుండైనా పోటీ చేసి తీరుతామని తెలుగుదేశం పార్టీ అధ్యక్షుడు నారా చంద్రబాబు నాయుడు మంగళవారం తెలంగాణ రాష్ట్ర సమితికి సవాల్ విసిరారు. కూకట్‌పల్లి 117వ వార్డు ఉప ఎన్నికల్లో తెదేపా గెలుపొందడంతో ఆ పార్టీ కార్యకర్తలు ర్యాలీగా చంద్రబాబు ఇంటికి చేరుకున్నారు. ఈ సందర్భంగా ఆయన కార్యకర్తలనుద్దేశించి మాట్లాడారు. బాన్సువాడలో తాము సదుద్దేశ్యంతో పోటీ చేయలేదని కానీ తెరాస దానిని తప్పుగా చిత్రీకరిస్తోందని అన్నారు. తమ మంచితనాన్ని అలసత్వంగా తీసుకున్నారని భవిష్యత్తులో తాము ఎక్కడి నుండైనా పోటీ చేస్తామని ప్రకటించారు. ఎప్పుడు ఎన్నికలు జరిగినా హైదరాబాదులో ఎక్కువ ఓట్లు వచ్చేది తెదేపాకే అన్నారు. కూకట్ పల్లిలో తెరాస పోటీకి ఎందుకు నిలపలేదో చెప్పాలని ప్రశ్నించారు. టిఆర్ఎస్, కాంగ్రెసు కుమ్మక్కైనా టిడిపిని ఓడించ లేక పోయాయన్నారు.

తెలంగాణ అభివృద్ధి విషయంలో ఎలాంటి చర్చకైనా తాను సిద్ధంగా ఉన్నానని ప్రకటించారు. రంగారెడ్డి జిల్లాల్లో భూములకు రేట్లు పెరగడానికి కారణం తెదేపా హయాంలో జరిగిన అభివృద్ధే అన్నారు. హైదరాబాదుకు ప్రపంచ పటం తెదేపా స్థానం కల్పిస్తే కాంగ్రెసు మాత్రం భ్రష్టు పట్టిస్తోందని ఆరోపించారు. ఎస్‌ఈజెడ్ పేరుతో కాంగ్రెసు నేతలు భూములు అమ్ముకుంటున్నారని ఆరోపించారు. ఎవరెన్ని చెప్పినా టిడిపిపై ప్రజలకు విశ్వాసం ఉందన్నారు. కాంగ్రెసు వాళ్లు రౌడీళ్లా ప్రవర్తించి తమ కార్యకర్తలపై దాడి చేయడం సరికాదన్నారు. ఇలాంటి వాటికి భయపడేది లేదన్నారు.

English summary

TDP chief Nara Chandrababu Naidu challenges TRS chief K Chandrasekhar Rao today. He questioned KCR about Kukatpally bypoll.