పిఆర్పీ మాజీ నేత పరకాల సభకు మళ్లీ తెలంగాణ సెగ

By Srinivas

Published: Tuesday, October 18, 2011, 12:13 [IST]

హైదరాబాద్: సోమాజిగూడలో ఏర్పాటు చేసిన విశాలాంధ్ర మహా సభకు మరోసారి తెలంగాణ సెగ తగిలింది. మాజీ ప్రజారాజ్యం పార్టీ నేత పరకాల ప్రభాకర్ విశాలాంధ్ర పేరుతో ఏర్పాటు చేసిన విలేకరుల సమావేశాన్ని తెలంగాణ జర్నలిస్టులు అడ్డుకున్నారు. గత ప్రెస్ మీట్‌లో తమపై అనుచిత వ్యాఖ్యలు చేసిందుకు క్షమాపణ చెప్పాలని వారు డిమాండ్ చేశారు. అప్పుడు తమపై దుర్బషాలాడిన కుమార్ చౌదరిని సమావేశం నుండి బయటకు పంపించాలని లేదంటే మీడియా సమావేశాన్ని బహిష్కరిస్తామని పరకాలను నిలదీశారు. పోలీసులు కల్పించుకొని తెలంగాణ వాదులను వారించే ప్రయత్నాలు చేశారు. వారు తమ పట్టు వీడక పోవడంతో కుమార్ చౌదరి బయటకెళ్లారు.

అనంతరం పరకాల ప్రభాకర్ మాట్లాడుతూ రాష్ట్ర విభజన డిమాండ్ సమంజసం కాదన్నారు. ఈ నెల 22, 23 తేదీల్లో విశాలాంధ్ర మహాసభలను హైదరాబాదులో నిర్వహిస్తామన్నారు. ఈ సభలను తాము రాష్ట్రంలోని వాస్తవ పరిస్థితులను వివరించేందుకే ఏర్పాటు చేస్తున్నామన్నారు. కాగా రైలు రోకో సందర్భంగా తెలంగాణ ప్రజా ప్రతినిధుల అరెస్టును నిరసిస్తూ హైకోర్టు తెలంగాణ లాయర్లు విధులు బహిష్కరించారు. కోర్టు ముందు ధర్నాకు దిగారు. వెంటనే తెలంగాణ ఇవ్వాలంటూ నినాదాలు చేశారు. పోలీసులు వారని అడ్డుకొని అదుపులోకి తీసుకున్నారు. నేతల అరెస్టును నిరసిస్తూ వారు అంతకుముందు హైకోర్టు వరకు లాంగ్ మార్చ్ నిర్వహించారు.

Published On October 18, 2011