శిఖండిని పెట్టుకొని ఉద్యమమా?: టిటిడిపిపై ఈటెల

By Srinivas

Published: Tuesday, October 25, 2011, 16:49 [IST]

హైదరాబాద్: పోలవరం టెండర్ల విషయంలో తమ పార్టీపై నాలుగు రోజులుగా అనవసర ఆరోపణలు చేస్తున్నారంటూ తెలంగాణ రాష్ట్ర సమితి శాసనసభా పక్షనేత ఈటెల రాజేందర్ మంగళవారం తెలుగుదేశం పార్టీ తెలంగాణ నేతలపై, ఆ పార్టీ చీఫ్ నారా చంద్రబాబు నాయుడుపై తీవ్రస్థాయిలో ధ్వజమెత్తారు. తెలంగాణకు ద్రోహం చేసింది కాంగ్రెసు, తెలుగుదేశం పార్టీలేనన్నారు. ఆ పార్టీలను పాతరేసే దిశగా ఉద్యమాన్ని రూపొందిస్తామన్నారు. ఉద్యోగులు సమ్మెను విరమించట్లేదని చెప్పినప్పటికీ కాంట్రాక్టుల కోసం సమ్మె ఆపుతున్నారని అనవసర ఆరోపణలు చేస్తున్నారని విమర్సించారు. సకల జనుల సమ్మె విజయవంతమైందన్నారు. తెలంగాణపై టిడిపికి చిత్తశుద్ధి ఉంటే ఆ పార్టీ చీఫ్ చంద్రబాబు పోలవరం టెండర్లు రద్దు చేయాలని ప్రభుత్వానికి లేఖ రాయాలని డిమాండ్ చేశారు. టిడిపికి లేఖ రాసే దమ్ము లేదన్నారు. తెలంగాణ టిడిపి నేతలు శిఖండిని అడ్డు పెట్టుకొని ఉద్యమిస్తున్నారన్నారని ఖబర్దార్ అంటూ హెచ్చరించారు.

రాజకీయాలకు కాంట్రాక్టు రూపంను తీసుకు వచ్చిందే చంద్రబాబు అని విమర్శించారు. దివంగత ముఖ్యమంత్రి ఎన్టీఆర్ ఉన్నప్పుడు కార్యకర్తలతో ఉన్న పార్టీని కాంట్రాక్టర్ల పార్టీగా మార్చారని ఎద్దేవా చేశారు. నామా నాగేశ్వర రావు, సుజనా చౌదరి, నూకారపు సూర్య ప్రకాశ్ రావు తదితర కాంట్రాక్టర్లకు ఎంపీ సీటు ఇచ్చారన్నారు. టిఆర్ఎస్ మీద ఆరోపణలు చేస్తే ఆకాశం మీద ఉమ్మేసినట్లేనన్నారు. పోలవరం టెండర్లపై బహిరంగ చర్చకు మేం సిద్ధమని మా చీఫ్ కె చంద్రశేఖర రావు వస్తారని చంద్రబాబును తీసుకు వస్తారా అని ప్రశ్నించారు.

తెలంగాణలో పార్టీ ఎప్పుడో కనుమరుగైందని సీమాంధ్ర ప్రాంతంలోనూ టిడిపిని దొంగలు, దుర్మార్గుల పార్టీగా అక్కడి ప్రజలు ఛీదరించుకుంటున్నారన్నారు. టిడిపికి తగిన గుణపాఠం చెబుతామన్నారు. నాలుగు రోజులుగా ఆరోపణలు చేసిన వారిపై విజిలెన్స్‌కు లేఖ రాస్తున్నామన్నారు. వారు భేషరతుగా క్షమాపణలు చెప్పకపోతే చర్యలు తీసుకుంటామని హెచ్చరించారు.

Published On October 25, 2011