సరైన సమయంలో ప్రభుత్వంపై అవిశ్వాసం: బాబు

అనంతపురం: ముఖ్యమంత్రి కిరణ్ కుమార్ రెడ్డి ప్రభుత్వంపై సరైన సమయంలో అవిశ్వాస తీర్మానం ప్రతిపాదిస్తామని తెలుగుదేశం పార్టీ అధ్యక్షుడు, ప్రతిపక్ష నేత నారా చంద్రబాబు నాయుడు చెప్పారు. ప్రతి సమస్యకు అవిశ్వాసమే పరిష్కారం కాదని ఆయన అన్నారు అనంతపురం జిల్లాలో తొలి రోజు బుధవారం రైతు పోరు బాట పేర పాదయాత్ర పూర్తి చేసిన అనంతరం ఆయన మీడియా ప్రతినిధులతో మాట్లాడారు. ప్రభుత్వం రైతు సమస్యలను పట్టించుకోవడం లేదని ఆయన విమర్శించారు. రైతులు ఆత్మహత్యలకు పాల్పడవద్దని ఆయన సూచించారు. ఆత్మహత్యలకు పాల్పడకుండా సమస్యల పరిష్కారానికి ప్రభుత్వంపై పోరాడాలని ఆయన పిలుపునిచ్చారు. స్వామినాథన్ కమిటీ సిఫార్సులను అమలు చేయాలని, వ్యవసాయానికి ప్రత్యేక బడ్జెట్‌ను ప్రతిపాదించాలని ఆయన ప్రభుత్వాన్ని కోరారు.

తాను ఎవరి కార్యక్రమాలను కాపీ కొట్టలేదని ఆయన ఓ టీవీ చానెల్ ప్రతినిధికి ఇచ్చిన ఇంటర్వ్యూలో అన్నారు. తమకు ఆ అవసరం లేదని, చాలా మంది తమ కార్యక్రమాలను కాపీ కొట్టారని, ప్రజల్లో చైతన్యం తేవడానికి తాము ప్రయత్నిస్తున్నామని ఆయన అన్నారు. తాను ప్రభుత్వంపై అనేక విధాలుగా పోరాడుతున్నానని, ఈ ప్రభుత్వం చలించడం లేదని ఆయన అన్నారు. ఈ ఏడాది కరవు వచ్చిందని, రైతులు విపరీతంగా నష్టపోయారని ఆయన అన్నారు. రైతు సమస్యలపై శానససభలోనూ పార్లమెంటులోనూ పోరాడుతామని ఆయన అన్నారు. వ్యవసాయం లాభసాటిగా మారేంత వరకు పోరాటం చేస్తామని ఆయన అన్నారు. రైతు సమస్యల పరిష్కారానికి ప్రత్యేక పార్లమెంటు సమావేశాలు ఏర్పాటు చేయాలని ఆయన డిమాండ్ చేశారు.

English summary

TDP president N Chandrababu Naidu said that he will propose No - Confidence motion against government.