గాలి మైనింగ్ కేసు: కర్ణాటకలో సిబిఐ సోదాలు

By Pratap

Published: Friday, November 4, 2011, 10:01 [IST]

బెంగళూరు: కర్ణాటక మాజీ మంత్రి గాలి జనార్దన్ రెడ్డి అక్రమ మైనింగ్ కేసుల్లో సిబిఐ అధికారులు మరిన్ని సోదాలకు దిగారు. కర్ణాటక సిబిఐ అధికారులు మూడు బృందాలుగా ఏర్పడి శుక్రవారం ఉదయం సోదాలను ప్రారంభించారు. బళ్లారిలోని సండూరు మైనింగ్ కంపెనీ కార్యాలయంలో సోదాలు జరుగుతున్నాయి. అలాగే, డెక్కన్ మైనింగ్, అసోసియేట్ మైనింగ్ కంపెనీల కార్యాలయాల్లో కూడా సిబిఐ అధికారులు సోదాలు నిర్వహిస్తున్నారు. మూడు చోట్ల ఏకకాలంలో సిబిఐ అధికారులు సోదాలు నిర్వహిస్తున్నారు.

మరో వైపు, గాలి జనార్దన్ రెడ్డి మైనింగ్ కేసులో సిబిఐ అధికారులు వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డిని ప్రశ్నించేందుకు సమాయత్తమవుతున్నారు. గాలి జనార్దన్ రెడ్డికి, వైయస్ జగన్మోహన్ రెడ్డికి మధ్య గల వ్యాపార లావాదేవీలపై, మైనింగ్ లీజులో వైయస్ జగన్ పాత్రపై సిబిఐ అధికారులు ఆరా తీస్తారని అంటున్నారు.

Published On November 4, 2011