బాబు కేసు వేగవంతం, నోటీసులివ్వలేదన్న సిబిఐ జెడి

By Srinivas

Published: Tuesday, November 29, 2011, 14:53 [IST]

హైదరాబాద్: తెలుగుదేశం పార్టీ అధినేత నారా చంద్రబాబు నాయుడు ఆస్తుల కేసు విషయంలో సిబిఐ విచారణ వేగవంతం చేసింది. మంగళవారం సిబిఐ అధికారులు సబ్ రిజిస్ట్రార్ కార్యాలయం నుండి బాబుకు సంబంధించిన ఆస్తుల పత్రాలను తెప్పించుకున్నారు. ఆదాయపన్ను శాఖ నుండి ఆస్తులకు సంబంధించిన పూర్తి వివరాలను కోరారు. వైయస్సార్ కాంగ్రెసు పార్టీ గౌరవ అధ్యక్షురాలు వైయస్ విజయమ్మ పిటిషన్‌లోని అన్ని అంశాల పైనా సిబిఐ అధికారులు ఆరా తీస్తున్నారు.

కాగా చంద్రబాబు ఆస్తుల కేసు విషయంలో ఇప్పటి వరకు తాము ఎవ్వరికీ నోటీసులు ఇవ్వలేదని సిబిఐ జాయింట్ డైరెక్టర్ లక్ష్మీ నారాయణ చెప్పారు. కేసుకు సంబంధించిన పత్రాలను పూర్తిగా సేకరించి పరిశీలించిన తర్వాతే బాబుతో సహా మిగతా ప్రతివాదులకు నోటీసులు జారీ చేస్తామని చెప్పారు. కేసుకు సంబంధించి ఐటి నుండి వివరాలు సేకరిస్తున్నామని చెప్పారు. కోర్టుకు సమర్పించిన ఆధారాల పరిశీలన ప్రక్రియ ప్రస్తుతం కొనసాగుతోందన్నారు.

Published On November 29, 2011