చిరు తర్జన భర్జన, ప్రాధాన్యం లేదంటున్న ఎమ్మెల్యేలు

హైదరాబాద్: తమ ఎమ్మెల్యేలకు విప్ జారీ చేయడానికి తిరుపతి శాసనసభ్యుడు చిరంజీవి తర్జన భర్జన పడుతున్నట్లుగా కనిపిస్తోంది. ఆదివారం ఉదయం చిరంజీవి తన నివాసంలో ప్రజారాజ్యం పార్టీ తరఫున గెలిచిన ఎమ్మెల్యేలతో భేటీ అయ్యారు. విప్ జారీ చేసే అంశంపై వారితో చర్చిస్తున్నారు. కొందరు ఎమ్మెల్యేలు విప్ జారీ చేయడానికి అనుకూలంగా ఉన్నప్పటికీ దాదాపు ఏడెనిమిది మంది ఎమ్మెల్యేలు విప్‌కు అభ్యంతరాలు చెబుతున్నట్లుగా తెలుస్తోంది.

రాష్ట్రంలో ప్రభుత్వం పడిపోకుండా మనం ఆదుకుంటున్నప్పటికీ కాంగ్రెసు మాత్రం మనకు ప్రాధాన్యత ఇవ్వడం లేదని అలాంటి ప్రభుత్వాన్ని కాపాడటానికి విప్ జారీ చేయాల్సిన అవసరం ఏమిటని కొందరు చిరుని ప్రశ్నిస్తున్నట్టుగా తెలుస్తోంది. మనకు కాంగ్రెసు సరియైన ప్రాధాన్యం ఇచ్చి ఉంటే విప్ జారీ చేసినా బాగుండేదని కానీ పిఆర్పీని విలీనం చేసి ఆరు నెలలు దాటినా కనీసం మీకు కూడా ప్రాధాన్యత కలిగిన పోస్టు ఇవ్వలేదని ఎమ్మెల్యేలు చిరుతో ఆవేదన వ్యక్తం చేసినట్లుగా తెలుస్తోంది.

ఇంత ప్రజాభిమానం కలిగి ఆపత్కాలంలో అదుకున్న మీ పరిస్థితే ఇప్పుడు ఇలా ఉంటే తర్వాత్తర్వాత ఎలా ఉంటుందోనని పలువురు ఎమ్మెల్యేలు చిరంజీవితో అనుమానం వ్యక్తం చేసినట్లుగా తెలుస్తోంది. అయితే వ్యక్తిగతంగా విప్ జారీ చేయాలని భావిస్తున్న చిరంజీవి వారికి నచ్చజెప్పే ప్రయత్నాలు చేస్తున్నట్లుగా సమాచారం.

English summary

Tirupati MLA Chiranjeevi is in dilemma on whip issue to his mlas. He met his mlas in his resident today.