ఇదేనా చిరంజీవి మార్క్ సామాజిక న్యాయం?: టిడిపి

By Srinivas

Published: Friday, January 20, 2012, 8:58 [IST]

హైదరాబాద్: సామాజిక న్యాయం పేరుతో ప్రజారాజ్యం పార్టీ స్థాపించిన చిరంజీవి ఇప్పుడు సొంత సామాజిక వర్గానికి కిరణ్ కుమార్ రెడ్డి మంత్రివర్గంలో న్యాయం చేసుకున్నారని తెలుగుదేశం పార్టీ పార్లమెంటు సభ్యుడు నిమ్మల కిష్టప్ప, దాడి వీరభద్రా రావు గురువారం విమర్శించారు. కాంగ్రెసులో పిఆర్పీ విలీనం చేశాక సొంత వర్గానికి న్యాయం చేసుకోవడమే సామాజిక న్యాయమా అని ప్రశ్నించారు. ఆయన ఏ ఉద్దేశ్యంతో పిఆర్పీ స్థాపించారో దానిని విస్మరించారన్నారు. మంత్రి పదవుల పంపిణీలో చిరంజీవి సాధించిన న్యాయం ఏమిటో చెప్పాలన్నారు. అధికార కాంగ్రెసు పార్టీలో, చిరంజీవి వర్గంలో చేనేత సామాజిక వర్గానికి చెందిన శాసనసభ్యులు ఉన్నప్పటికీ వారికి మంత్రివర్గంలో చోటు కల్పించక పోవడం దారుణమన్నారు.

ప్రభుత్వంలోని పెద్దల అవినీతి, అక్రమాలు, వైఫల్యాల వల్ల విద్యుత్ సంస్థలు పదివేల కోట్లు నష్టపోయాయని మరో నేత మైసూరా రెడ్డి వేరుగా ఆరోపించారు. జెన్‌కో ప్లాంట్ల నిర్మాణ అంచనాలను భారీగా పెంచేసి మూడువేల కోట్లు, రైతులకోసం అధిక ధరకు కొన్న విద్యుత్‌ను పరిశ్రమలకు అక్రమంగా సరఫరా చేయడం ద్వారా మరో రెండువేల కోట్లు, ప్రైవేట్ విద్యుత్ సంస్థలకు గ్యాస్‌ను తరలించేసి ఐదువేల కోట్ల దాకా తినేశారని ధ్వజమెత్తారు. ఈ నష్టాన్ని ప్రజల నుంచి వసూలు చేయాలని చూడటం దుర్మార్గమన్నారు. విద్యుత్ రెగ్యులేటరీ కమిషన్ ప్రభుత్వం చేతిలో కీలుబొమ్మ మాదిరిగా తయారైందని ఆరోపించారు.

Published On January 20, 2012