దాడికి చేదుఅనుభవం, సిఎంను కలిసిన రామానాయుడు

By Srinivas

Published: Tuesday, January 31, 2012, 11:08 [IST]

హైదరాబాద్: ముఖ్యమంత్రి క్యాంప్ కార్యాలయం వద్ద తెలుగుదేశం పార్టీ నేత దాడి వీరభద్ర రావుకు సోమవారం చేదు అనుభవం ఎదురయింది. జూడాల సమస్యలు వెంటనే పరిష్కరించాలని కోరుతూ దాడి ఆధ్వర్యంలో పలువురు తెలుగుదేశం పార్టీ నేతలు ఉదయం క్యాంప్ కార్యాలయానికి వచ్చారు. దాడి కారును లోనికి వెళ్లకుండా సెక్యూరిటీ సిబ్బంది అడ్డుకున్నారు. తనకు ముఖ్యమంత్రిని కలిసేందుకు అపాయింటుమెంట్ ఉందని తనను అనుమతించాలని సెక్యూరిటీకి సూచించారు. మండలి ప్రతిపక్ష నేతగా తనకు వెళ్లే హక్కు ఉందని వారికి చెప్పారు. ఓ సమయంలో సెక్యూరిటీ పైన ఆయన ఆగ్రహం కూడా వ్యక్తం చేశారు. అప్పటికీ అనుమతించక పోవడంతో సిఎం పేషీకి సమాచారమందించారు. అక్కడి నుండి ఎలాంటి స్పందన రాకపోవడంతో దాడితో సహా మిగిలిన నేతలు గేటు బయట నుండే వెనుదిరిగారు. దీంతో ముఖ్యమంత్రికి జూడాల సమస్యలపై విజ్ఞప్తి పత్రం ఇవ్వకుండానే తిరుగి రావాల్సి వచ్చింది.

ఈ ఘటనపై దాడి మీడియాతో మాట్లాడారు. ముఖ్యమంత్రి ప్రోటోకాల్ పాటించడం లేదని మండిపడ్డారు. ప్రతిపక్ష పార్టీలను అవమానించేలా ముఖ్యమంత్రి, ముఖ్యమంత్రి కార్యాలయం వ్యవహరిస్తోందని ఆరోపించారు. కాగా క్యాంప్ కార్యాలయంలో ముఖ్యమంత్రి కిరణ్ కుమార్ రెడ్డిని కార్మిక శాఖ మంత్రి దానం నాగేందర్, మైనార్టీ శాఖ మంత్రి అహ్మదుల్లా కలిశారు. ప్రముఖ సినీ నిర్మాత డాక్టర్ డి రామానాయుడు కూడా ముఖ్యమంత్రిని క్యాంప్ కార్యాలయంలో కలిశారు.

Published On January 31, 2012