వైయస్ఆర్ చచ్చి బతికిపోయారు: సిపిఐ నారాయణ

By Srinivas

Published: Thursday, February 2, 2012, 15:46 [IST]

ఖమ్మం: వామపక్ష పార్టీల ఏకతకు తెలంగాణ, సీమాంధ్ర అంశాలు అడ్డు కావని సిపిఐ రాష్ట్ర కార్యదర్శి నారాయణ గురువారం అన్నారు. సిపిఎం 23వ జాతీయ సమావేశాలు ఖమ్మం జిల్లాలో జరుగుతున్నాయి. ఈ కార్యక్రమంలో నారాయణ పాల్గొన్నారు. ఈ సందర్భంగా ఆయన మాట్లాడారు. అవినీతిపై పోరాడే నైతిక హక్కు కేవలం కమ్యూనిస్టులకే ఉందని అన్నారు. గుడి, గుళ్లో దేవుణ్ణి అమ్ముకునే కేంద్ర, రాష్ట్ర ప్రభుత్వాలను ఇంటికి పంపించాల్సిన సమయం ఆసన్నమైందన్నారు. వామపక్షాలు మరింత బలపడాల్సి ఉందని, ఆ రోజులు త్వరలోనే వస్తాయని అన్నారు. రాష్ట్రంలో వామపక్షాలు కలవాల్సిన ఆవశ్యకత ఉందన్నారు. ఐక్యత ద్వారా ప్రజా ఉద్యమాలను బలోపేతం చేయాలన్నారు. కమ్యూనిస్టు పార్టీలు వసూలు చేసే ప్రతి పైసా కాంగ్రెసు ప్రభుత్వాన్ని కూల్చేందుకేనని ఆయన అన్నారు. కాగా బుధవారం మల్లు భట్టి విక్రమార్క సిపిఎం రూ.25 కోట్లు వసూలు చేసిందని ఆరోపించిన విషయం తెలిసిందే. దీనికి నారాయణ కౌంటర్ ఇచ్చారు. దివంగత ముఖ్యమంత్రి వైయస్ రాజశేఖర రెడ్డి చచ్చి బ్రతికి పోయారని, బతికుంటే చచ్చిపోయే వారని అన్నారు.

కాగా ఈ మహా సభలను తొలితరం కమ్యూనిస్టు నాయకుడు పర్స సత్యనారాయణ జెండా ఆవిష్కరించి ప్రారంభించారు. అనంతరం సిపిఎం జాతీయ కార్యదర్శి ప్రకాశ్ కరత్ ప్రారంభోపన్యాసం చేశారు. సిపిఎం కేంద్ర కమిటీ సభ్యుడు తమ్మినేని వీరభద్రం అధ్యక్షోపన్యాసం చేశారు. పాటూరి రామయ్య అధ్యక్షతన జరిగిన ఈ సభలో సిపిఎం పోలిట్ బ్యూరో సభ్యురాలు బృందాకారత్, మల్లు స్వరాజ్యం తదితరులు పాల్గొన్నారు.

Published On February 2, 2012