వారిని వదిలేసి, వీరిని టార్గెట్ చేస్తే ఎలా?: దత్తాత్రేయ

By Pratap

Published: Saturday, February 4, 2012, 13:19 [IST]

హైదరాబాద్: వివిధ కుంభకోణాల్లో సిబిఐ మంత్రులను వదిలేసి, అధికారులపై మాత్రమే చర్యలు తీసుకుంటే ఎలా అని బిజెపి సీనియర్ నాయకుడు బండారు దత్తాత్రేయ ప్రశ్నించారు. ఎమ్మార్ ప్రాపర్టీస్ కుంభకోణం కేసులో విధాన నిర్ణయాలు చేసిన మంత్రులను సిబిఐ వదిలేసి, అధికారులను లక్ష్యం చేసుకోవడం సరైంది కాదని ఆయన శనివారం మీడియా ప్రతినిధులతో అన్నారు. దాని వల్ల సిబిఐ విశ్వసనీయత కోల్పోతుందని ఆయన అన్నారు. తప్పుల్లో మంత్రులకూ బాధ్యత ఉంటుందని ఆయన అన్నారు. ముఖ్యమంత్రి, మంత్రుల పాత్ర లేకుండా ఎమ్మార్ వంటి భారీ కుంభకోణం జరదని ఆయన అన్నారు.

తిరుమల తిరుపతి దేవస్థానం విషయంలో తగిన చర్యలు తీసుకోవాలని ఆయన ప్రభుత్వాన్ని కోరారు. తిరుమల ఆదాయ వ్యయాలపై శ్వేత పత్రం విడుదల చేయాలని ఆయన డిమాండ్ చేశారు. వివిధ కుంభకోణాల్లో మంత్రులను సైతం విచారించాలని తెలుగుదేశం పార్టీ నాయకుడు మండవ వెంకటేశ్వర రావు సిబిఐని డిమాండ్ చేశారు. ప్రభుత్వాన్ని కాపాడే విధంగా సిబిఐ వ్యవహరించడం సరి కాదని ఆయన విడిగా మీడియా ప్రతినిధులతో అన్నారు.

Published On February 4, 2012