గనుల కేసు: ఐఏఎస్ అధికారి శ్రీలక్ష్మిపై నేడు చార్జీషీట్?

By Srinivas

Published: Tuesday, February 21, 2012, 9:56 [IST]

హైదరాబాద్: కర్నాటక మాజీ మంత్రి గాలి జనార్ధన్ రెడ్డికి చెందిన ఓబుళాపురం మైనింగ్ కంపెనీ కేసులో ఐఏఎస్ అధికారిణి శ్రీలక్ష్మిపై అదనపు చార్జిషీట్‌ను సిబిఐ అధికారులు మంగళవారం దాఖలు చేయనున్నట్లు సమాచారం. ఆమెపై చార్జిషీట్ దాఖలు చేసే అంశం విషయంలో సిబిఐ కేంద్రం అనుమతి కోసం ఎదురు చూస్తోంది. అక్రమ మైనింగ్ కేసుకు సంబంధించిన మొదటి చార్జిషీట్‌లో శ్రీలక్ష్మి పేరును సిబిఐ అధికారులు చేర్చని విషయం తెలిసిందే. శ్రీలక్ష్మిపై వచ్చిన అభియోగాలు తదుపరి చార్జిషీట్‌లో నమోదు చేస్తామని అప్పట్లో సిబిఐ అధికారులు కోర్టుకు తెలియజేశారు. సుప్రీం కోర్టులో శ్రీలక్ష్మి బెయిల్ పిటిషన్‌పై మంగళవారం వాదనలు జరగనున్నాయి. ఈ నేపథ్యంలో సుప్రీం ఆదేశాల మేరకు సిబిఐ అధికారులు నాంపల్లి కోర్టులో అదనపు చార్జిషీట్ దాఖలు చేయడానికి రంగం సిద్ధం చేశారని తెలుస్తోంది. అయితే ఐఏఎస్ అధికారిపై నేరాభియోగం మోపాలంటే కేంద్ర ప్రభుత్వ అనుమతి కావాల్సి ఉంటుంది. ఇప్పటి దాకా అనుమతి రాకపోవడంతో సిబిఐ జెడి లక్ష్మీనారాయణ, ఓఎంసి కేసు దర్యాప్తు అధికారి, అడిషనల్ ఎస్పి ఢిల్లీలో మకాం వేశారు.

సోమవారం శివరాత్రి కావడంతో మంగళవారం ఉదయాన్నే అనుమతి లభిస్తుందని ఎదురు చూస్తున్నారు. అక్కడ అనుమతి లభించిన వెంటనే ఇక్కడి అధికారులు చార్జిషీట్ కోర్టుకు సమర్పించే అవకాశముంది. ఒకవేళ ఈ రోజు అనుమతి లభించని పక్షంలో బుధవారం దాఖలు చేయవచ్చునని తెలుస్తోంది. కాగా శ్రీలక్ష్మి బెయిల్ పిటిషన్‌పై మంగళవారం సుప్రీం కోర్టు విచారణ జరపనుంది. గాలి అక్రమ మైనింగ్ కుంభకోణంలో శ్రీలక్ష్మి కూడా నిందితురాలేనని పేర్కొంటూ గత ఏడాది నవంబర్ 28వ తేదీన సిబిఐ ఆమెను అరెస్టు చేసింది. తర్వాత ఆమెకు బెయిల్ మంజూరు చేస్తూ సిబిఐ కోర్టు ఇచ్చిన ఆదేశాలను హైకోర్టు తోసిపుచ్చింది. దీంతో ఆమె సుప్రీం కోర్టులో పిటిషన్ దాఖలు చేశారు. చార్జిషీటులో పేర్కొన్న అభియోగాలను పరిశీలించిన తర్వాతే నిర్ణయం తీసుకుంటామని ధర్మాసనం స్పష్టం చేసింది. తదుపరి విచారణను ఈ నెల 21వ తేదీకి వాయిదా వేసింది. ఈనేపథ్యంలో శ్రీలక్ష్మి బెయిల్ పిటిషన్‌పై మంగళవారం విచారణ జరగనుంది.

Published On February 21, 2012