'వైయస్ఆర్' జివోల అంశం ఈనాడులో వచ్చింది: విహెచ్

న్యూఢిల్లీ: హైదరాబాద్, రంగారెడ్డి ప్రాంతాల్లోని విలువైన భూములను కాజేయడానికి దివంగత ముఖ్యమంత్రి వైయస్ రాజశేఖర రెడ్డి హయాంలో మూడోకంటికి తెలియకుండా రహస్య ఉత్తర్వులు వెలువడిన విషయం ఈనాడు పత్రికలో వచ్చిందని కాంగ్రెసు పార్టీ సీనియర్ నేత వి హనుమంత రావు సోమవారం న్యూఢిల్లీలో అన్నారు. వైయస్ ఉన్నప్పుడు ఆ ఉత్తర్వులను అడ్డు పెట్టుకొని వేలకోట్ల విలువైన భూములను కొల్లగొట్టారని ఆరోపించారు. శ్మశానాలు, కబేళాలు, ఆలయాలు తదితర భూములను వేటినీ వదలలేదన్నారు. తలదాచుకోవడానికి గుడిసె వేసుకుంటామంటే పేదలకు పదిగజాల స్థలం ఇవ్వలేని ప్రభుత్వం పెద్దలకు వేల కోట్ల విలువైన భూములు కట్టబెట్టడమంటే ప్రజాధనాన్ని నిలువు దోపిడీ చేయడమేనన్నారు. కర్నాటక మాజీ మంత్రి గాలి జనార్ధన్ రెడ్డి అడవుల్లో ఇనుప ఖనిజాన్ని దోచుకుంటే, వైయస్ఆర్ వంది మాగధులు రాష్ట్ర రాజధానిలో బంగారంలాంటి భూములు దోచుకున్నారన్నారు.

ఇనుప ఖనిజం దోపిడీపై సుప్రీం కోర్టు దర్యాఫ్తునకు ఆదేశించినట్లే రాజధాని భూదోపిడీపై కూడా ఉన్నతస్థాయి విచారణ జరగాలన్నారు. ఖాళీగా ఉన్న భూములను ప్రభుత్వం స్వాధీనం చేసుకొని పేదల కోసం ఉపయోగించాలన్నారు. మద్యం సిండికేట్లపై ఎసిబి దాడులు జరిగినట్లే భూమాఫియాపై దర్యాఫ్తు జరగాలన్నారు. అవినీతిపై కాంగ్రెసు అధిష్టానం ఉక్కుపాదం మోపుతోందని ఆ బాటలో ముఖ్యమంత్రి కిరణ్ కుమార్ రెడ్డి నడిచి భూదోపిడీకి పాల్పడ్డ వారిపై చర్యలు తీసుకోవాలని విజ్ఞప్తి చేశారు. తన అనునయులకు అప్పనంగా కట్టబెట్టడానికి వైయస్సార్ ప్రయోగించిన జివోలపై పూర్తిస్థాయి విచారణ జరగాలని ఆయన డిమాండ్ చేశారు. హౌస్ కమిటీకి విచారణ బాధ్యతలు అప్పగించాలన్నారు.

English summary

Congress senior leader V Hanumantha Rao accused late YS Rajasekhar Reddy for land mafia at Ranga Reddy and Hyderabad.