సభ వాయిదా, అసెంబ్లీలో కిరణ్‌ రెడ్డితో బొత్స సత్తిబాబు

By Srinivas

Published: Thursday, March 1, 2012, 11:03 [IST]

హైదరాబాద్: విపక్షాలు తమ వాయిదా తీర్మానాలను ఆమోదించాలని స్పీకర్‌ను శాసనసభలో డిమాండ్ చేస్తూ పోడియంను చుట్టుముట్టడంతో స్పీకర్ సభను పావుగంట పాటు వాయిదా వేశారు. గురువారం ఉదయం సభ ప్రారంభమయ్యాకు విపక్షాలు తమ తమ తీర్మానాలను స్పీకర్ కు ఇచ్చాయి. స్పీకర్ విపక్షాల వాయిదా తీర్మానాలు అన్నింటిని తిరస్కరించారు. దీంతో టిడిపితో సహా అన్ని పార్టీల నేతలు పోడియం చుట్టుముట్టారు. సభా కార్యక్రమాలు సజావుగా జరిగేందుకు సహకరించాలని స్పీకర్ ఎంతగా విజ్ఞప్తి చేసినప్పటికీ పరిస్థితిలో మార్పు రాలేదు. దీంతో స్పీకర్ సభను వాయిదా వేశారు.

దివంగత ముఖ్యమంత్రి వైయస్ రాజశేఖర రెడ్డి హయాంలో జరిగిన భూకేటాయింపులపై అసెంబ్లీలో చర్చ జరగాలని టిడిపి నేతలు పట్టుబట్టారు. కుంభకోణం వెనుక ఉన్న బడాబాబుల పేర్లు బయటకు రావాలని అన్నారు. దీనిపై సభలో చర్చిద్దామంటే స్పీకర్ తమ గొంతు నొక్కే ప్రయత్నం చేస్తున్నారని టిడిపి విమర్శించింది. కాగా సభ వాయిదా పడిన అనంతరం ముఖ్యమంత్రి కిరణ్ కుమార్ రెడ్డితో ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ భేటీ అయ్యారు.

Published On March 1, 2012