విజయమ్మనంటావా, నీ చరిత్రేంటి?: ఆనంపై కొణతాల

హైదరాబాద్: తమ పార్టీ గౌరవ అధ్యక్షురాలు, పులివెందుల శాసనసభ్యురాలు వైయస్ విజయమ్మ పైనే విమర్శలు చేస్తావా? అసలు నీ చరిత్ర ఏమిటో? అంటూ వైయస్సార్ కాంగ్రెసు పార్టీ నేత, మాజీ మంత్రి కొణతాల రామకృష్ణ ఆర్థిక శాఖ మంత్రి ఆనం రామనారాయణ రెడ్డిపై గురువారం ధ్వజమెత్తారు. విజయమ్మను ప్రశ్నించే ముందు ఆనం తన చరిత్ర ఏమిటో వెనక్కి తిరిగి చూసుకోవాలని సూచించారు. ఆయన ఆరోపణలు సిగ్గు చేటు అన్నారు. శ్రీ పొట్టి శ్రీరాములు నెల్లూరు జిల్లాలోని కొవ్వూరు నియోజకవర్గంలో ప్రజలు అధికార కాంగ్రెసు, ప్రతిపక్ష తెలుగుదేశం పార్టీలకు దిమ్మ దిరిగేలా ఫలితం ఇస్తారని ఆయన అన్నారు. టిడిపి, కాంగ్రెసులకు ఉప ఎన్నికల్లో డిపాజిట్ కూడా రాదన్నారు.

ఉప ఎన్నికలకు భయపడే కాంగ్రెసు పార్టీ తమ పార్టీ అధినేత వైయస్ జగన్మోహన్ రెడ్డి వర్గం ఎమ్మెల్యేలపై చర్యలు తీసుకోడం లేదని ఆరోపించారు. వారిపై వేటు వేస్తే ఉప ఎన్నికల్లో డిపాజిట్ కూడా దక్కదనే ఉద్దేశ్యంతోనే ఎలాంటి చర్యలు తీసుకోవడం లేదన్నారు. జగన్ కొవ్వూరులో రెండు విడతలుగా ప్రచారం చేస్తారని చెప్పారు. ఈ నెల 4, 5, 6 తేదీల్లో మొదటి విడత, 14, 15 తేదీల్లో రెండో విడత ప్రచారం చేస్తారని చెప్పారు.

English summary

YSR Congress Party leader Konathala Ramakrishna blamed minister Anam Ramanarayana Reddy for questioning YS Vijayamma.