పుట్టిన రోజు పేరుతో ఇంట్లో..: యువతీయువకుల అరెస్ట్

By Srinivas

Updated: Tuesday, August 21, 2012, 15:50 [IST]

హైదరాబాద్: రాజధాని హైదరాబాదు నగర పరిసరాల్లోని ఘట్‌కేసర్‌లో జరుగుతున్న ఓ రేవ్ పార్టీ పైన పోలీసులు దాడులు చేశారు. పార్టీ పేరుతో అసభ్యకర నృత్యాలు చేస్తున్న అమ్మాయిలు, అబ్బాయిలపై కేసు నమోదు చేశారు. పుట్టిన రోజు సందర్భంగా ఎనిమిది మంది యువతులు, మరికొంత మంది యువకులు కలిసి ఘట్‌కేసర్ సమీపంలోని వెంకటాద్రి టౌన్ షిప్‌లోని ఓ ఇంట్లో రేవ్ పార్టీ నిర్వహించారు. రేవ్ పేరుతో వారు అసభ్యకర నృత్యాలు చేస్తున్నారని తెలుసుకున్న పోలీసులు దాడులు నిర్వహించి వారిని అదుపులోకి తీసుకున్నారు. యువతీ యువకులతో పాటు హుక్కా సామాగ్రిని, నాలుగు మద్యం బాటిళ్లను పోలీసులు సంఘటనా స్థలం నుండి స్వాధీనం చేసుకున్నారు.

సరూర్ నగర్‌లో చైన్ స్నాచింగ్‌లు చేస్తున్న నలుగురు దొంగలను పోలీసులు అరెస్టు చేశారు. నలుగురు ముఠాగా కలిసి కొద్దిరోజులుగా చైన్ స్నాచింగ్‌లకు పాల్పడుతున్నారు. ఈ రోజు వారిని అదుపులోకి తీసుకున్న పోలీసులు వారి వద్ద నుండి రూ.8 లక్షల విలువ చేసే 27 తులాల బంగారాన్ని స్వాధీనం చేసుకున్నారు.

పాతబస్తీ ఛత్రినాకలో ఆటో డ్రైవర్ గులాం ఖదీర్ పైన ఉదయం కొందరు దుండగులు కత్తులతో దాడి చేశారు. తీవ్రంగా గాయపడిన ఖాదీర్‌ను స్థానికులు ఆసుపత్రికి తరలించారు. ఆయన పరిస్థితి ప్రస్తుతం నిలకడగానే ఉంది. పాత కక్షలతోనే ఆటో డ్రైవర్ పైన దాడికి పాల్పడినట్లు పోలీసులు అనుమానాలు వ్యక్తం చేస్తున్నారు.