ఢిల్లీ రేప్: నిందితుల తరఫున వాదనకు లాయర్లు నో

న్యూఢిల్లీ: దేశాన్ని దిగ్భ్రాంతికి గురి చేసిన ఢిల్లీ గ్యాంగ్ రేప్ కేసు నిందితుల తరఫున వాదించకూడదని ఢిల్లీ కోర్టు న్యాయవాదులు నిర్ణయించుకున్నారు. అత్యాచారం, హత్య కేసుల్లో ఇరుక్కున్న నిందితుల తరఫున వాదించబోమని న్యాయవాదులు చెప్పారు. ఈ కేసు విచారణ దక్షిణ ఢిల్లీలోని సాకేత్ జిల్లా కోర్టులో గురువారం ప్రారంభమయ్యే అవకాశాలున్నాయి.

ఈ కేసుకు సంబంధించి పోలీసులు వేయి పేజీల చార్జిషీట్ దాఖలు చేయనున్నారు. ఐదుగురు నిందితులపై అభియోగాలు మోపుతూ ఈ చార్జిషీట్ దాఖలు చేస్తారు. నిందితుల తరఫున ఏ న్యాయవాది కూడా వకాల్తా తీసుకోడని, అలా తీసుకోవడం అనైతికమని సాకేత్ జిల్లా బార్ కౌన్సిల్ సభ్యుడు, న్యాయవాది సంజయ్ కుమార్ అన్నారు.

కోర్టులో నమోదు చేసుకున్న 2,500 మంది న్యాయవాదులు కూడా నిందితుల తరఫున వాదనకు దూరంగా ఉండి, వేగంగా న్యాయం జరిగేలా చూస్తారని న్యాయవాదులు అంటున్నారు. ఆరో నిందితుడు మైనర్ కావడంతో అతనిపై జువైనల్ కోర్టులో విచారణ జరుగుతుంది. అతని వయస్సును నిర్ధారించుకోవడానికి అతనికి పోలీసులు ఎముకల పరీక్ష చేయాలని నిర్ణయించుకున్నారు.

23 ఏళ్ల వైద్య విద్యార్థినిని ఆరుగురు వ్యక్తులు ఇటీవల దారణంగా గ్యాంగ్ రేప్ చేసిన విషయం తెలిసిందే. ఆ అమ్మాయి చికిత్స పొందుతూ సింగపూర్ ఆస్పత్రిలో మరణించింది. 13 రోజులు మృత్యువుతో పోరాటి ఆమె మరణించింది. ఆమె పేరును బయటపెడితే తమకేమీ అభ్యంతరం లేదని ఆమె తల్లిదండ్రులు అంటున్నారు.

English summary

Lawyers at a Delhi court hearing the case of the fatal gang-rape which has shocked the nation said on Wednesday they would refuse to defend the men accused of taking part in the assault and murder.