కత్తులతో దాడిలో ఇద్దరి మృతి, చంపేయాలంటూ

By Srinivas

Updated: Wednesday, February 13, 2013, 9:18 [IST]

నెల్లూరు: శ్రీ పొట్టి శ్రీరాములు నెల్లూరు జిల్లాలోని హరనాథపురంలోని మూడో వీధిలో మంగళవారం దారుణం జరిగింది. కొందరు దుండగులు ఓ ఇంట్లో జొరబడి బీభత్సం సృష్టించారు. ఫార్మసీ కళాశాల యజమాని ఇంట్లోకి జొరబడ్డ దుండగులు విచక్షణా రహితంగా వారిపై కత్తులతో దాడులు చేశారు. కళాశాల యజమాని ఇంట్లోకి ఐదుగురు వ్యక్తులు జొరబడ్డారు. అక్కడ యజమాని దినకరన్ రెడ్డి ఆయన భార్య శకుంతల, కూతురు భార్గవి పైన కత్తులతో దాడి చేశారు.

ఈ ఘటనలో ముగ్గురు తీవ్రంగా గాయపడ్డారు. గమనించిన స్థానికులు వెంటనే వారిని స్థానిక ఆసుపత్రికి తరలించారు. ఆసుపత్రికి తరలిస్తుండగా కూతురు భార్గవి మృతి చెందింది. భార్య శకుంతల ఆసుపత్రిలో చికిత్స పొందుతూ మృతి చెందింది. దినకరన్ పరిస్థితి విషమంగా ఉంది. ఆయనకు వైద్యులు చికిత్స అందిస్తున్నారు. ఈ దాడిలో మొత్తం ఐదుగురు పాల్గొన్నట్లుగా స్థానికులు గుర్తించారు.

స్థానికులు వారిని పట్టుకొని చితకబాదారు. స్థానికులు చూడటంతో ఐదుగురిలో ఇద్దరు పారిపోయారు. మరో ముగ్గురు ఇంట్లోనే ఉండిపోయారు. వారిని స్థానికులు చితకబాదారు. పోలీసులు వచ్చి ముగ్గురుని అదుపులోకి తీసుకున్నారు. మొదట ఒక వ్యక్తని పోలీసులు పట్టుకున్నారు. మిగిలిన ఇద్దరు ఓ గదిలో గడియ వేసుకొని లోపలే ఉండిపోయారు. పోలీసులు వారిని బయటకు రప్పించి అదుపులోకి తీసుకున్నారు. మొత్తం ముగ్గురు ఇప్పుడు పోలీసుల అదుపులో ఉన్నారు.

నిందితులను కాల్చి చంపేయాలంటూ స్థానికులు ఆందోళనకు దిగారు. వారు పోలీసు జీపును చుట్టుముట్టారు. భార్గవి కుటుంబంపై దాడి చేసిన వారి బతకడానికి వీలులేదంటూ స్థానికులు ఆగ్రహం వ్యక్తం చేశారు. వారిని వెంటనే షూట్ చేసి చంపాలని పోలీసులను కోరారు. కాగా ఈ ఘటనకు ప్రేమ వ్యవహారనే కారణమనే వాదనలు వినిపిస్తున్నాయి. భార్గవి ఎంబిబిఎస్ చదువుతోంది.