'జగన్‌పై ఎదురుదాడి ఇలాకాదు: అందరు ప్లాన్ చేయాలి'

By Srinivas

Updated: Tuesday, April 16, 2013, 18:22 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి తన తండ్రి వైయస్ రాజశేఖర రెడ్డి అధికారాన్ని అడ్డుపెట్టుకొని దోచుకున్నారనే ఆరోపణలు వస్తున్న విషయం తెలిసిందే. అయితే, విషయాలను ప్రజలకు వివరించేందుకు ఓ విధానాన్ని రూపొందించాలా? అంటే అవుననే అంటున్నారు కాంగ్రెసు పార్టీ సీనియర్ నేత ఆమోస్.

జగన్ పైన కాంగ్రెసు పార్టీ నేతలు ఎవరికి వారు విరుచుకు పడుతున్న విషయం తెలిసిందే. మరికొందరు వైయస్‌ను కూడా టార్గెట్ చేసుకుంటుండగా ఇంకొందరు మౌనం దాల్చుతున్నారు. కొందరు నేతలు సమాధానాలు దాట వేస్తున్నారు. ఈ నేపథ్యంలో ఆమోస్ మంగళవారం మాట్లాడుతూ... 2014 సాధారణ ఎన్నికలు సమీపిస్తున్న నేపథ్యంలో జగన్ దోపిడీని ప్రజలకు వివరించేందుకు ఒక విధానాన్ని రూపొందించాల్సిన అవసరముందని అభిప్రాయపడ్డారు.

జగన్ అవినీతి పైన మంత్రులు తలోరీతిన మాట్లాడటం సరైంది కాదన్నారు. మంత్రులంతా సమావేశమై ఒకే వైఖరిని రూపొందించుకోవాలని సూచించారు. కాంగ్రెసు శాసనసభా పక్షం, పార్టీ సమావేశాన్ని ఏర్పాటు చేయాలని డిమాండ్ చేసారు. కాంగ్రెసు పార్టీతోనే తెలంగాణ సాధ్యమని ఆమోస్ చెప్పారు. పార్టీని వీడే వారు వీడవచ్చునని, ప్రక్షాళణ చేసే అవకాశం వస్తుందన్నారు.

2014లోపే తెలంగాణపై ప్రకటన: సర్వే

తెలంగాణ కాంగ్రెసు పార్లమెంటు సభ్యులు పార్టీని మారితే అవకాశవాదులుగా మిగిలిపోతారని కేంద్రమంత్రి సర్వే సత్యనారాయణ వేరుగా అన్నారు. ఇచ్చిన మాట ప్రకారం తమ పార్టీ అధ్యక్షురాలు సోనియా గాంధీ తెలంగాణను ఏర్పాటు చేస్తారన్నారు. జగన్‌ను చంచల్‌గూడ జైలులో ఉంచినందుకే దర్బార్ నడుపుతున్నారని, తీహార్ జైలులో ఉంచి ఉంటే ఈ హంగామా ఉండేది కాదన్నారు. ప్రభుత్వం ఆయనపై కక్ష సాధింపు చేస్తుందన్న వాదనలో పస లేదన్నారు.