బొగ్గు స్కాం: దాసరి నారాయణరావుని ప్రశ్నించిన సిబిఐ

By Srinivas

Published: Monday, May 13, 2013, 11:45 [IST]

న్యూఢిల్లీ: కేంద్రంలో ప్రకంపనలు సృష్టించిన బొగ్గు కుంభకోణం కేసులో దర్శకరత్న, మాజీ కేంద్రమంత్రి దాసరి నారాయణ రావును ప్రశ్నించినట్లుగా సెంట్రల్ బ్యూరో ఆఫ్ ఇన్వెస్టిగేషన్(సిబిఐ) వెల్లడించింది. ఈ కుంభకోణానికి సంబంధించి మాజీ మంత్రులను ప్రశ్నించినట్లు సిబిఐ తెలిపింది.

2006-2009 మధ్యకాలంలో బొగ్గు శాఖలో భారీ కుంభకోణం జరిగిందని కాగ్ నివేదిక ద్వారా వెలుగు చూసిన విషయం తెలిసిందే. అప్పుడు దాసరి బొగ్గు శాఖ సహాయమంత్రిగా ఉన్నారు. ఈ నేపథ్యంలో కేసుకు సంబంధించి మాజీ మంత్రులను ప్రశ్నించినట్లు సిబిఐ తెలిపింది. దాసరిని హైదరాబాదులోనే సిబిఐ ప్రశ్నించినట్లుగా తెలుస్తోంది. దాసరితో పాటు మరో మాజీ మంత్రి సంతోష్ బగ్రోడియాను కూడా ప్రశ్నించినట్లు తెలిపింది.

ధర్మానపై పిసి యాక్టు తొలగిస్తాం: సిబిఐ కోర్టు

మరోవైపు వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి అక్రమాస్తుల కేసులో ఆరోపణలు ఎదుర్కొంటున్న మంత్రి ధర్మాన ప్రసాద రావు పైన పిసి యాక్టు తొలగిస్తామని సిబిఐ కోర్టు తెలిపింది. హైకోర్టు తీర్పు నేపథ్యంలో దానిని తొలగిస్తామని చెప్పింది.

ప్రభుత్వం అనుమతి లేకుండానే ధర్మానను విచారించేందుకు కిందికోర్టు అనుమతించడంతో హైకోర్టు దానిని తోసిపుచ్చిన విషయం తెలిసిందే. హైకోర్టులో ధర్మానకు ఈ విషయంలో ఊరట లభించింది. దీంతో అతనిపై పిసి యాక్టు తొలగిస్తామని సిబిఐ కోర్టు తెలిపింది. కాగా, వ్యక్తిగత కారణాలతో తాను కోర్టుకు హాజరు కాలేకపోతున్నానని మంత్రి ధర్మాన ప్రసాద రావు కోర్టుకు తెలిపారు.

Published On May 13, 2013