భారత్‌లోకి టెస్లా వచ్చేస్తోంది!.. ట్యాక్స్ ఎంతంటే?

భారతీయ ఆటోమొబైల్ పరిశ్రమలో ఆసక్తికరమైన మలుపు తిరగబోతుంది. ప్రపంచ ఎలక్ట్రిక్ వాహన దిగ్గజం టెస్లా భారతదేశంలోకి ప్రవేశించేందుకు సన్నాహాలు చేస్తుండటంతో, దిగుమతి సుంకాలపై కేంద్ర ప్రభుత్వం కీలక నిర్ణయాలు తీసుకునే అవకాశం కనిపిస్తోంది. ముఖ్యంగా, అమెరికా నుండి దిగుమతి అయ్యే కార్లపై సుంకాలు పూర్తిగా తొలగించే దిశగా భారత్ - అమెరికా మధ్య వాణిజ్య చర్చలు జరుగుతున్నట్లు తెలుస్తోంది. ఈ పరిణామం టెస్లా రాకకు మార్గం సుగమం చేయడమే కాకుండా, దేశీయ ఆటోమొబైల్ రంగంలోనూ పెను మార్పులకు దారితీయవచ్చని నిపుణులు అంచనా వేస్తున్నారు.

ఆటో టారిఫ్‌ తగ్గింపుపై ఒత్తిడి
ప్రస్తుతం భారత్ విదేశీ కార్ల దిగుమతులపై ఏకంగా 110 శాతం సుంకాన్ని విధిస్తోంది. ఈ అధిక సుంకాల విధానంపై టెస్లా అధినేత ఎలాన్ మస్క్ గతంలో పలుమార్లు బహిరంగంగా విమర్శలు చేశారు. ప్రపంచంలోనే కార్లపై అత్యధిక సుంకాలు విధిస్తున్న దేశంగా భారత్‌ను అభివర్ణించారు. అయితే, ఇప్పుడు పరిస్థితులు మారుతున్నాయి. మస్క్ అమెరికాలోని డోజ్ విభాగానికి సారథ్యం వహిస్తున్న నేపథ్యంలో, ట్రంప్‌తో ఆయనకున్న సన్నిహిత సంబంధాలు చర్చనీయాంశంగా మారాయి. ట్రంప్ సైతం భారతీయ ఆటో టారిఫ్‌లపై తీవ్ర అసంతృప్తి వ్యక్తం చేస్తున్నారు. ఇటీవల అమెరికా కాంగ్రెస్‌లో మాట్లాడుతూ, భారత్‌పై ప్రతీకార సుంకాలు విధిస్తామని హెచ్చరించడం గమనార్హం.

కేంద్రం ఆచితూచి అడుగులు.
ఈ నేపథ్యంలో, అమెరికా వర్గాలు భారత్‌లో పలు రంగాల్లో సుంకాలను పూర్తిగా తొలగించాలని డిమాండ్ చేస్తున్నాయి. ముఖ్యంగా ఆటోమొబైల్ రంగంపై జీరో టారిఫ్ విధానం అమలవుతుందని భావిస్తున్నారు. అయితే, భారత్ మాత్రం ఈ విషయంలో ఆచితూచి వ్యవహరిస్తోంది. అమెరికా ఒత్తిడికి తలొగ్గి తక్షణమే సుంకాలను పూర్తిగా తొలగించేందుకు సిద్ధంగా లేదు. దేశీయ ఆటోమొబైల్ పరిశ్రమతో చర్చించి, వారి ప్రయోజనాలను పరిరక్షిస్తూ ఒక సమతూక విధానాన్ని రూపొందించాలని భావిస్తోంది.

సుంకాలపై అమెరికాతో చర్చలు
ఇటీవల జరిగిన ట్రంప్-మోదీ భేటీ సందర్భంగా కూడా టారిఫ్‌ల అంశం, స్వేచ్ఛా వాణిజ్య ఒప్పందం వంటివి చర్చకు వచ్చాయి. ఇరు దేశాల మధ్య వాణిజ్యాన్ని 500 బిలియన్ డాలర్లకు చేర్చాలని లక్ష్యంగా పెట్టుకున్నారు. ప్రస్తుతం కేంద్ర వాణిజ్య శాఖ మంత్రి పీయూష్ గోయల్ వారం రోజుల పర్యటనలో అమెరికాలో ఉన్నారు. ఈ పర్యటనలో భాగంగా అమెరికా వాణిజ్య మంత్రి హువార్డ్ లుట్నిక్ మరియు వాణిజ్య ప్రతినిధి గ్రీర్‌తో ఆయన సమావేశం కానున్నారు. ఈ చర్చల్లో ఆటో టారిఫ్‌ల అంశం ప్రధానంగా ఉంటుందని తెలుస్తోంది.

కార్ల మార్కెట్‌లో తీవ్ర పోటీ..
భారతదేశం ప్రపంచంలోనే అతిపెద్ద ఆటోమొబైల్ మార్కెట్లలో ఒకటిగా ఎదుగుతోంది. ఇక్కడ ఏటా 40 లక్షల కార్లు అమ్ముడవుతున్నాయి. దేశీయ ఆటోమొబైల్ సంస్థలకు ప్రపంచంలోనే అత్యంత రక్షణ కల్పించే మార్కెట్‌గా భారత్ నిలిచింది. అయితే, టెస్లా వంటి అంతర్జాతీయ దిగ్గజాలు భారత మార్కెట్‌లోకి ప్రవేశిస్తే పోటీ తీవ్రతరం కానుంది. వినియోగదారులకు అత్యాధునిక సాంకేతిక పరిజ్ఞానం అందుబాటులోకి వస్తుంది. అదే సమయంలో దేశీయ సంస్థలు కూడా అంతర్జాతీయ ప్రమాణాలకు అనుగుణంగా తమ ఉత్పత్తులను మెరుగుపరచుకోవలసి ఉంటుంది.

ఇటీవల భారత్ 30 రకాల వస్తువులపై సుంకాలను తగ్గించింది. వీటిలో అత్యున్నత శ్రేణి మోటార్ సైకిళ్లు కూడా ఉన్నాయి. ఇది సంకేతప్రాయమైన చర్యగా భావించవచ్చు. రానున్న రోజుల్లో ఆటోమొబైల్ సుంకాలను తగ్గించే విషయంలో భారత్ మరింత సానుకూలంగా స్పందించే అవకాశం ఉంది. టెస్లా రాకతో భారతీయ ఆటోమొబైల్ రంగం కొత్త పుంతలు తొక్కడం ఖాయంగా కనిపిస్తోంది. ఈ పరిణామాల నేపథ్యంలో, రాబోయే వాణిజ్య చర్చలు , ప్రభుత్వ నిర్ణయాలు దేశీయ ఆటోమొబైల్ పరిశ్రమ భవిష్యత్తును నిర్దేశించనున్నాయి.

English summary

Tesla is entering the Indian market with zero tax Trade talks between the US and India