టీ బిల్లు పెట్టండి: సుష్మా, యత్నిస్తున్నాం: కమల్నాథ్

న్యూఢిల్లీ: పార్లమెంటు శీతాకాలం సమావేశాల్లోనే తెలంగాణ బిల్లు ప్రతిపాదించాలని బిజెపి నేత సుష్మా స్వరాజ్ ప్రభుత్వాన్ని కోరారు. సిపిఐ నాయకులు కూడా అదే విజ్ఞప్తి చేశారు. ఈ సమావేశాల్లోనే తెలంగాణ బిల్లును ప్రతిపాదించడానికి తీవ్ర ప్రయత్నాలు చేస్తున్నామని పార్లమెంటరీ వ్యవహారాల మంత్రి కమల్‌నాథ్ అన్నారు. ఈ నెల 5వ తేదీ నుంచి జరిగే పార్లమెంటు సమావేశాలపై కమల్‌నాథ్ ఆధ్వర్యంలో సోమవారం సాయంత్రం అఖిల పక్ష సమావేశం జరిగింది.

తెలంగాణ బిల్లును శీతాకాలం సమావేశాల్లో ప్రతిపాదించాలని తాను కోరానని, ప్రక్రియ సాగుతోందని, సమయం పట్టే అవకాశాలున్నాయని, బిల్లు మంత్రి వర్గం ఆమోదించి రాష్ట్రపతికి పంపాల్సి ఉందని, రాష్ట్రపతి నుంచి న్యాయశాఖకు రావాలని హోం మంత్రి సుశీల్ కుమార్ షిండే చెప్పారని సుష్మా స్వరాజ్ చెప్పారు. ప్రక్రియ ఈలోగా పూర్తయితే ఈ సమావేశాల్లోనే ప్రతిపాదిస్తామని కమల్‌నాథ్ చెప్పారు.

తెలంగాణ బిల్లును ఈ సమావేశాల్లో ప్రతిపాదించాలని అన్ని పార్టీల నాయకులు సూచించారని, ఈ సమావేశాల్లోగా ప్రక్రియ పూర్తి కాకపోతే అందరూ కోరితే ప్రత్యేక సమావేశాలను ఏర్పాటు చేస్తామని చెప్పామని, అయితే ప్రత్యేక సమావేశాలపై నిర్ణయం తీసుకోలేదని కమల్‌నాథ్ మీడియా ప్రతినిధులతో చెప్పారు.

ఆయా పార్టీల వైఖరిని బట్టి బిల్లును వ్యతిరేకించవచ్చు లేదా ఆమోదించవచ్చు గానీ బిల్లు మాత్రం ఈ పార్లమెంటు సమావేశాల్లోనే రావాలని అన్ని రాజకీయ పార్టీలు కోరుకుంటున్నాయని కమల్‌నాథ్ చెప్పారు. బిల్లు పార్లమెంటుకు రావడం ముఖ్యమని పార్టీలు అంటున్నాయని ఆయన చెప్పారు. సమావేశాలను తెలంగాణ బిల్లు కోసం పొడిగిస్తారా అంటే ఆయన సమాధానం చెప్పలేదు.

English summary

BJP leader Sushma Swaraj has demanded to propose Telangana bill in the parliament winter session. Parliamentary affairs minister Kamalnath assured for that.