అలర్ట్: తెలంగాణలో వాహనాల పొల్యూషన్ టెస్టింగ్ ఫీజు పెంపు, ఏ వాహనానికి ఎంతంటే?

హైదరాబాద్: తెలంగాణ వాహనదారులకు ఇది కొంత చేదువార్తే. ఎందుకంటే.. రాష్ట్రంలో వాహనాల పొల్యూషన్ టెస్టింగ్ పరీక్ష ఫీజును పెంచాలని నిర్ణయించినట్లు తెలంగాణ రవాణా శాఖ వెల్లడించింది. ఇక నుంచి వాహనాన్ని పరీక్షించి సర్టిఫికెట్‌ను జారీ చేసేందుకు టీవీలర్ వాహనానికి రూ. 50, పెట్రోల్ త్రీ వీలర్స్‌కు రూ. 60, పెట్రోల్ కార్లకు రూ. 75, డీజిల్ కార్లకు రూ. 100, డీజిల్‌లో ఇతర కేటగిరీ వాహనాలన్నింటికీ రూ. 100 చొప్పున ఫీజు వసూలు చేయనున్నట్లు రవాణా శాఖ ఉత్తర్వులు జారీ చేసింది.

ఈ మేరకు రవాణా శాఖ జీవో నెంబర్ 23ను విడుదల చేసింది. ప్రస్తుతం ఏడేళ్ల క్రితం ఉన్న ఛార్జీలనే అమలు చేస్తున్నారన్నారు. అయితే, ఈ ఏడేళ్లలో వేతనాలు, ఇతర వ్యయాలు పెరిగాయని.. అందుకే పొల్యూషన్ టెస్టింగ్ ఫీజు పెంచుతున్నట్లు ఉత్తర్వులు పేర్కొన్నారు.

స్కూల్ బస్సులపై ఆర్టీఏ కొరఢా: పిట్నెస్ లేని బస్సులు సీజ్

రాష్ట్ర వ్యాప్తంగా పాఠశాలలు తిరిగి ప్రారంభమవుతున్న క్రమంలో ప్రైవేటు బస్సులను రవాణా శాఖ అధికారులు తనిఖీ చేశారు. రంగారెడ్డి జిల్లా వ్యాప్తంగా స్కూల్ బస్సులను రవాణా శాఖ అధికారులు తనిఖీ నిర్వహించారు. నిబంధనలు ఉల్లంఘించిన బస్సులను అధికారులు సీజ్ చేశారు. మరికొన్ని ప్రాంతాల్లోనూ తనిఖీలు చేశారు.

వనస్థలిపురంలో స్కూల్ బస్సులను తనిఖీ చేసిన ఆర్టీఏ అధికారులు.. నిబంధనలకు విరుద్ధంగా నడుపుతున్న 2 బస్సులను సీజ్ చేశారు. రాజేంద్రనగర్‌లో మూడు బస్సులు సీజ్ చేశారు. ఫిట్నెస్, ఇన్స్యూరెన్స్, పర్మిట్, పొల్యూషన్, డ్రైవింగ్ లైసెన్స్, ఫస్ట్ ఎయిడ్ బాక్స్ వంటి వాటిని కూడా క్షుణ్ణంగా పరీక్షిస్తున్నారు అధికారులు. ఈ తనిఖీల్లో వివిధ పాఠశాలలకు చెందిన మొత్తం ఆరు బస్సులను సీజ్ చేశారు. రాష్ట్ర వ్యాప్తంగా ఈ తనిఖీలు కొనసాగుతున్నాయి.

English summary

vehicle pollution testing fees hiked in telangana.