తెలంగాణ ఎన్నారైల సమావేశం

తెలంగాణ ఎన్నారై సంఘం జర్నలిస్టు, రచయిత ఎన్. వేణుగోపాల్ తో సమావేశాన్ని నిర్వహించింది. ఈ నెల 3వ తేదీన ఫిలడెల్ఫియాలోని కింగ్ ఆప్ ప్రష్యా బావర్చి ఇండియన్ రెస్టారెంటులో జరిగింది. ప్రస్తుత తెలంగాణ ఉద్యమం, దాని పుట్టుక గురించి ఆయన ఈ సమావేశంలో వివరించారు. వివిధ రంగాల్లో తెలంగాణకు జరిగిన మోసాన్ని ఆయన వివరించారు. తెలంగాణ సమగ్రాభివృద్ధికి చేపట్టాల్సిన కార్యక్రమాల గురించి ఆయన చెప్పారు. ప్రస్తుత పాలనలో ఆర్థిక రంగంలోనే కాకుండా ఆత్మగౌరవం, సాంస్కృతిక అస్తిత్వ విషయాల్లో కూడా తెలంగాణ అణచివేతకు గురవుతోందని ఆయన అన్నారు.

ఉప ఎన్నికల ఫలితాలపై కూడా చర్చ జరిగింది. తెలంగాణ రాష్ట్ర ఏర్పాటుకు సంబంధించిన ప్రజల ఆకాంక్షను ఈ ఎన్నికలు ప్రతిబింబించలేదని, కొంత మంది శాసనసభ్యుల పట్ల ఉన్న అసంతృప్తి ఈ ఎన్నికల్లో వ్యక్తమైందని వేణుగోపాల్ అన్నారు. ప్రజల్లో తెలంగాణ చైతన్యం పెరుగుతోందని ఆయన అభిప్రాయపడ్డారు. తెలంగాణ రాష్ట్ర సమితి (తెరాస) తన విధానాలను మార్చుకుని 2009 ఎన్నికలకు సిద్ధం కావాలని కొంత మంది అభిప్రాయపడ్డారు. తెలంగాణ చరిత్ర, సంస్కృతి, అస్తిత్వాలకు సంబంధించి జరుగుతున్న రాజకీయేతర ఉద్యమాల గురించి ఆయన వివరించారు. చివరగా రవి మేరెడ్డి కృతజ్ఞతలు తెలియజేశారు.