మైండ్ బ్లోయింగ్ కంబ్యాక్.. ఫైనల్లోకి మెస్సీ సేన

ఫుట్‌బాల్ ప్రపంచకప్‌లో డిఫెండింగ్ ఛాంపియన్ అర్జెంటీనా మరోసారి తన సత్తా చాటింది. ఉత్కంఠభరితంగా సాగిన సెమీఫైనల్ పోరులో ఇంగ్లండ్‌ను మట్టికరిపించి మెస్సీ సేన ఫైనల్లోకి దూసుకెళ్లింది. ఆఖరి నిమిషం వరకు ఉత్కంఠ రేపిన ఈ మ్యాచ్‌లో అర్జెంటీనా 2-1 గోల్స్ తేడాతో విజయం సాధించింది. బుధవారం రాత్రి జరిగిన ఈ మ్యాచ్‌లో ఇంగ్లండ్ ఆశలపై నీళ్లు చల్లుతూ అర్జెంటీనా ఆటగాళ్లు అద్భుతమైన ఆటతీరుతో ఆకట్టుకున్నారు. ఈ విజయంతో జూలై 19న జరిగే ఫైనల్ పోరులో స్పెయిన్‌తో అర్జెంటీనా తలపడనుంది.

మ్యాచ్ విషయానికి వస్తే.. ఫస్ట్ ఆఫ్ లో ఇరు జట్లు హోరాహోరీగా తలపడ్డాయి. అయితే, రెండో భాగంలో మ్యాచ్ ఒక్కసారిగా మలుపు తిరిగింది. ఆట 55వ నిమిషంలో ఇంగ్లండ్ ఆటగాడు ఆంథోనీ గోర్డాన్ గోల్ కొట్టి తన జట్టుకు 1-0 ఆధిక్యాన్ని అందించాడు. దాంతో 1966 తర్వాత తొలిసారి వరల్డ్ కప్ ఫైనల్ చేరాలనే ఇంగ్లండ్ కల నిజమవుతుందని అంతా భావించారు. గోల్ కొట్టిన ఉత్సాహంలో ఇంగ్లండ్ డిఫెన్స్‌పై ఎక్కువ దృష్టి పెట్టడంతో అర్జెంటీనాకు అటాక్ చేసే అవకాశం దొరికింది.

ఆ పట్టును అర్జెంటీనా వదల్లేదు.

మ్యాచ్ ముగియడానికి మరో ఐదు నిమిషాలు ఉందనగా (85వ నిమిషంలో) స్టార్ ప్లేయర్ లియోనల్ మెస్సీ అందించిన పాస్‌ను ఎంజో ఫెర్నాండెజ్ గోల్‌గా మలిచి స్కోరును సమం చేశాడు. ఇక మ్యాచ్ ఎక్స్‌ట్రా టైమ్‌కు వెళ్తుందనుకున్న తరుణంలో, ఇంజ్యూరీ టైమ్‌లో మెస్సీ ఇచ్చిన క్రాస్ పాస్‌ను లౌటారో మార్టినెజ్ హెడర్ ద్వారా గోల్ పోస్ట్‌లోకి పంపాడు. దీంతో అర్జెంటీనా క్యాంప్‌లో సంబరాలు మిన్నంటాయి. ఇంగ్లండ్ ఎంత ప్రయత్నించినా పరాజయం తప్పలేదు. మూడో స్థానం కోసం ఇంగ్లండ్ జట్టు ఫ్రాన్స్‌తో తలపడనుంది.

ఈ చారిత్రాత్మక విజయంపై అర్జెంటీనా కెప్టెన్ లియోనల్ మెస్సీ సోషల్ మీడియా వేదికగా స్పందించాడు. "మేం ఫైనల్లోకి అడుగుపెట్టాం. మ్యాచ్‌లో గెలవడం కోసం జట్టు సభ్యులంతా అద్భుతంగా శ్రమించారు. మరోసారి మేం అనుకున్నది సాధించాం. మాపై నమ్మకం ఉంచిన ప్రతి ఒక్కరికీ పేరుపేరునా ధన్యవాదాలు. కప్పు కొట్టడమే మా లక్ష్యం" అంటూ ఎమోషనల్ పోస్ట్ చేశాడు.