బోధన ఆస్పత్రుల్లో 1442 మంది అసిస్టెంట్ ప్రొఫెసర్ల నియామకం: ఫైనల్ మెరిట్ లిస్ట్ విడుదల

హైదరాబాద్: తెలంగాణ రాష్ట్ర వైద్యారోగ్య శాఖలో 1442 మంది అసిస్టెంట్ ప్రొఫెసర్ పోస్టుల నియామక ప్రక్రియ దాదాపు పూర్తయిపోయింది. ఈ పోస్టులకు సంబంధించిన తుది మెరిట్ జాబితాను రాష్ట్ర వైద్యారోగ్యశాఖ, ఆరోగ్య సేవల రిక్రూట్‌మెంట్ బోర్డ్ విడుదల చేసింది. అసిస్టెంట్ ప్రొఫెసర్ల నియామక ప్రక్రియను గత ఏడాది డిసెంబర్ నెలలో ప్రారంభించి 5 నెలల్లో పూర్తి చేశారు. బోధనాసుపత్రుల్లోని 34 స్పెషాలిటీ విభాగాల్లో అసిస్టెంట్ ప్రొఫెసర్లను నియమించనున్నారు.

కొత్తగా ప్రారంభమైన మెడికల్ కాలేజీల్లో మెరిట్ ఆధారంగా కౌన్సెలింగ్ నిర్వహించి నియమించనున్నట్లు వైద్యారోగ్య శాఖ ప్రకటించింది. కౌన్సెలింగ్ ప్రక్రయిను రెండు వారాల్లో పూర్తి చేయనున్నట్లు తెలిపింది. రాష్ట్రంలో గత సంవత్సరం 8 కొత్త ప్రభుత్వ వైద్య కళాశాలలు ప్రారంభం కాగా, ఈ ఏడాది మరో 9 ప్రారంభం కానున్నాయి.

అత్యధికంగా గైనకాలజీ విభాగంలో 187 మందిని నియమించనున్నారు. అనస్థీషియా విభాగంలో 177, జనరల్ సర్జరీలో 149, జనరల్ మెడిసిన్‌లో 144, పీడియాట్రిక్స్‌లో 94, ఆర్థో పెడిక్స్‌లో 72, రేడియో డయాగ్నస్టిక్స్‌లో 56, పాథాలజీలో 48, అనాటమీలో 37, ఫిజియాలజీలో 37 మందిని నియమించనుండగా.. మిగిలినవారు 24 విభాగాల్లో నియమితులు కానున్నారు.

మరోవైపు, ప్రభుత్వ ఆస్పత్రుల్లో అసిస్టెంట్ ప్రొఫెసర్లుగా ఎంపికైన వైద్యులకు ఆరోగ్యశాఖ మంత్రి హరీశ్ రావు శుభాకాంక్షలు తెలిపారు. జిల్లాకు ఒక మెడికల్ కాలేజీ ఏర్పాటు చేయాలన్న సీఎం కేసీఆర్ నిర్ణయంతో రాష్ట్రంలో వైద్య విద్య అవకాశాలు పెరిగి, సూపర్ స్పెషాలిటీ సేవలు మారుమూల ప్రాంతానికి కూడా చేరువయ్యాయని పేర్కొన్నారు. రెండు వారాల్లోగా కౌన్సెలింగ్ ప్రక్రియను పూర్తి చేసి, నియామక ఉత్తర్వులు అందించి, విధుల్లో చేరేందుకు చర్యలు తీసుకోవాలని వైద్యవిద్య డైరెక్టర్‌ను మంత్రి హరీశ్ రావు ఆదేశించారు.

Great News! MHSRB has released a selection list for 1,442 Assistant Professor posts in 34 specialties for appointment into new Government Medical colleges under @DMETelangana, as part of Hon'ble #CMKCR Garu's vision of one medical college in each district towards…

— Harish Rao Thanneeru (@BRSHarish) May 8, 2023

ప్రజలకు నాణ్యమైన వైద్య సేవలు అందించి, ఆరోగ్య తెలంగాణను సాకారం చేసేందుకు అంకితభావంతో, సేవా భావంతో కృషి చేయాలని మంత్రి హరీశ్ రావు ఆకాంక్షించారు. ఎంపిక ప్రక్రియను పూర్తి చేసిన నియామక బోర్డును అభినిందించారు. మరోవైపు, 5204 మంది స్టాఫ్ నర్సుల నియామకానికి కూడా ప్రక్రియ మొదలైందని వెల్లడించారు.

English summary

Selection list for 1,442 assistant professor posts in Telangana health department released.