బాబుకు 'సత్తా' గుబులు

తెలుగుదేశం పార్టీ అధ్యక్షుడు నారా చంద్రబాబు నాయుడుకు జయప్రకాష్ నారాయణ్ నేతృత్వంలోని లోకసత్తా భయం పట్టుకుంది. లోకసత్తా విద్యావంతుల్లో, యువతలో స్థానం సంపాదించుకుంటుండడంతో వచ్చే గ్రేటర్ హైదరాబాద్ ఎన్నికల్లో లోకసత్తా వల్ల తమకు నష్టం జరగవచ్చునని ఆయన భయపడుతున్నట్లు సమాచారం. అసెంబ్లీ-లోక్‌సభ ఎన్నికల్లో గ్రేటర్‌ పరిధిలో టీడీపీ విజయావకాశాలను దెబ్బ తీసిన విషయం తెలిసిందే. లోకసత్తా ముప్పు ఇంకా తొలగిపోలేదని తెలుగుదేశం పార్టీ సర్వేలో వెల్లడైనట్టు సమాచారం. ఎన్నికల తర్వాత లోక్‌ సత్తాను, ఆ పార్టీ అధినేత జేపీని లక్ష్యంగా చేసుకొని తెలుగుదేశం విమర్శలు గుప్పించడంలోని ఆంతర్యం ఇదేనని అంటున్నారు. లోక్‌ సత్తా-ప్రజారాజ్యం పార్టీల మధ్య పొత్తు ఉంటుందన్న అభిప్రాయం వినిపిస్తున్న నేపథ్యంలో గ్రేటర్‌లో టీడీపీ నుంచి మరింత ఓటుబ్యాంకును చీల్చే దిశగా లోక్‌ సత్తా నాయకులు ప్రయత్నిస్తున్నట్టు తెలుస్తోంది.

డివిజన్ల పునర్విభజన, రిజర్వేషన్లు కాంగ్రెస్‌-ఎంఐఎంలకు అనుకూలంగా జరిగినా ముఖాముఖీ పోటీ ఉంటే తమ పార్టీ బాగా పుంజుకుంటుందని టీడీపీ నేతలు విశ్వాసం వ్యక్తం చేస్తున్నారు. ఈ నేపథ్యంలో చేపట్టిన సర్వేలో లోక్‌ సత్తా కొన్నిచోట్ల గండికొట్టే అవకాశం ఉందని తేలిందని అంటున్నారు. కాంగ్రెస్‌, టీడీపీల మధ్య పోటీ తీవ్రంగా ఉన్నచోట్ల ఈ ప్రభావం కనిపిస్తోందని చెబుతున్నారు. ప్రస్తుతానికి కాంగ్రెస్‌-మజ్లిస్‌ కూటమికి గ్రేటర్‌లో మెజారిటీ డివిజన్లు దక్కే అవకాశాలున్నాయని, టీడీపీకి గౌరవప్రదమైన స్కోరు దక్కుతుందని సర్వేకర్తలు పార్టీ అధినేతకు చెప్పినట్టు తెలిసింది.

ఏ డివిజన్‌ లో ఎలాంటి ప్రభావం పడుతుందన్న అంశానికే చంద్రబాబు ప్రాధాన్యత ఇస్తున్నట్టు సమాచారం. ఆ ప్రభావాలను అధిగమించడానికి చేయాల్సిన యత్నాలపైనా దృష్టి సారించారు. ఇప్పటికే కొన్నిచోట్ల లోక్‌ సత్తా, పీఆర్పీ నేతలను పార్టీలోకి ఆహ్వానించిన బాబు మరికొన్ని చోట్లా అదే పని చేయడం ద్వారా ఆ పార్టీల ప్రభావాన్ని తగ్గించాలని భావిస్తున్నారు. గ్రేటర్‌లో టీడీపీ అభ్యర్థుల ఎంపిక ప్రక్రియను కూడా సర్వే ద్వారా చేపట్టారు.