గ్రేటర్ ఎన్నికల్లోనూ వైఎస్ పథకాల మహత్యం

వైయస్ ఆత్మ గ్రేటర్ హైదరాబాద్ ఎన్నికలను విడిచిపట్టినట్టు లేదు. ఆయన ఎన్నో ఏళ్ల క్రితం ప్రవేశపెట్టిన అభివృద్ధి, సంక్షేమ పథకాల ప్రభావం గ్రేటర్ ఎన్నికల్లోనూ కన్పించిందంటున్నారు. కాంగ్రెస్ ఓటు బ్యాంకు చెక్కు చెదరలేదని తెలుసుకున్న ఆ పార్టీ నాయకులు నిన్న సాయంత్రమే సంబరాలు జరుపుకున్నారు. అతి తక్కువ ఓట్లు పోలైతే అది అధికార పార్టీకి అనుకూలమన్నది మౌలిక సూత్రం. ప్రభుత్వ వ్యతిరేకత తీవ్రంగా ఉంటే ప్రతిపక్షాలకు అనుకూలంగా భారీ పోలింగ్ ఉంటుంది.

ఓటర్ల నిరుత్సాహం తెలుగుదేశం పార్టీని కుంగదీసింది. నిన్న పోలింగ్ ముగిసిన తర్వాత టిడిపి పెద్ద నాయకులెవరూ నోరు మెదపలేదు. ఈ ఎన్నికల్లో చిరంజీవిని చూడడానికి జనం బాగా వచ్చినా ఆ పార్టీ సీట్ల మీద కంటే ఓట్ల మీదనే ఎక్కువ నమ్మకం పెట్టుకుంది. ప్రజారాజ్యం, లోక్ సత్తా, బిజెపి లకు తలా ఒక అర డజను సీట్లు వస్తే గొప్పే. ఈ చిన్న ఎన్నికల్లోనూ రాజన్న పథకాలు పనిచేయడం విశేషమేనని కాంగ్రెస్ నాయకులు చెప్పుకుని ఉబ్బి తబ్బిబ్బు అవుతున్నారు.