మంత్రివర్గ విస్తరణ తర్వాత రోశయ్య విశ్వరూపం

ముఖ్యమంత్రి రోశయ్య గట్టిగా పట్టు బిగిస్త్తున్నారు. మంత్రివర్గ విస్తరణకు లాంచనప్రాయమైన అనుమతిని ఆయన హైకమాండ్ నుంచి ఆశిస్తున్నారు. ఆ అనుమతి లభిస్తే ఆయన తెలంగాణ ఉప ఎన్నికల తర్వాత రోశయ్య తన డ్రీం కేబినెట్ ను ఏర్పాటు చేసుకుంటారు. తోక ఎగరేస్తున్న కొందరు మంత్రులను ఆయన ఇంటికి పంపించి తనకు విధేయులైన శాసనసభ్యులను మంత్రివర్గంలోకి తీసుకునే అవకాశముంది. వైఎస్ జగన్ మొండితనం గురించి హైకమాండ్ కు మరోసారి వివరించి పరిస్ధితిని తనకు అనుకూలంగా మలుచుకోడానికి ఆయన ప్రయత్నిస్తున్నారు. ఒఎస్డిగా సీనియర జర్నలిస్టు వల్లీశ్వర్ ను తీసుకోవడం ఆయన ధైర్యంగా వ్యవహరిస్తున్నారని చెప్పకోడానికి ఒక ఉదాహరణ. వల్లీశ్వర్ పెద్ద బుర్ర ఉన్నవాడు కాదన్న అభిప్రాయం ఉంది. అయినా అతడిని తన మనిషిగా భావించి రోశయ్య అంత ముఖ్యమైన పదవిని కట్టబెట్టారు. ఇక ముందు కూడా ఇటువంటి సాహసోపేతమైన నిర్ణయాలు ఆయన తీసుకునే అవకాశముంది. మరీ ముఖ్యంగా మంత్రివర్గ విస్తరణ విషయంలో.

ముఖ్యమైన ఫైళ్ల విషయంలో కూడా రోశయ్య దూకుడుగా వెళ్తున్నట్టు సమాచారం. హైకమాండ్ కు నెలవారీ కప్పం చెల్లించుకోవాలి కాబట్టి ఆయన దూకుడుగా వ్యవహరించక తప్పని పరిస్ధితి ఏర్పడింది. ఈ విషయంలో ఆయన కెవిపి రామచంద్రరావును మొదట విశ్వాసంలోకి తీసుకున్నప్పటికీ ఇప్పుడు జగన్ వ్యవహారం కారణంగా ఆయన కెవిపి ని పూర్తిగా విశ్వసిస్తున్నట్టు కన్పించడం లేదు. రోశయ్య కొత్త కోటరీని తయారు చేసుకున్నట్టు విన్పిస్తోంది. ఆ కోటరీలో ఎవరెవరు ఉన్నారన్నది బయటపడడానికి ఇంకా కొన్ని రోజులు పట్టవచ్చు.