జోష్‌లో ఎన్టీఆర్ అల్లుడు దగ్గుబాటి

By Pratap

Published: Tuesday, November 15, 2011, 9:50 [IST]

ఎన్టీ రామారావు పెద్దల్లుడు దగ్గుబాటి వెంకటేశ్వర రావు అప్పట్లో తెలుగుదేశం పార్టీలో చిన్నల్లుడు నారా చంద్రబాబు నాయుడిని ఢీకొంటూ తెలుగుదేశం పార్టీ రాజకీయాల్లో జోరు మీద ఉండేవారు. ఇద్దరు అల్లుళ్ల మధ్య పోరు తీవ్రంగా ఉండేది. తెలుగుదేశం పార్టీ చంద్రబాబు చేతిలోకి వచ్చిన తర్వాత దగ్గుబాటి వెంకటేశ్వర రావు రాజకీయంగా చాలా క్లిష్ట పరిస్థితులను ఎదుర్కున్నారు. ఆ తర్వాత కాంగ్రెసు పార్టీలో చేరి తాను శానససభ్యుడైతే, భార్య పురంధేశ్వరి కేంద్రంలో మంత్రి పదవిని చేపట్టారు. ఆమె రాజకీయంగా చురుగ్గా వ్యవహరిస్తుంటే దగ్గుబాటి వెంకటేశ్వర రావు మాత్రం తన సహజశైలిలో తన పని చేసుకుంటూ పోతున్నారు.

దగ్గుబాటి వెంకటేశ్వర రావు పుస్తకాలు రాయడంలో నిమగ్నమైపోయారు. ఆయన అంచనాలు నిజమవుతుండడంతో ఆయన జోష్‌లో ఉన్నారని అంటున్నారు. 2009 ఎన్నికల్లో కాంగ్రెసు పార్టీ 150 నుంచి 160 వరకు శానససభా స్థానాలను గెలుచుకుంటుందని ఓ అంచనా వేశారు. ఆయన చెప్పిందే నిజమైంది. ఆ తర్వాత తెలంగాణపై ఆయన ఆ పుస్తక రాజాన్ని వెలువరించారు. తెలంగాణపై రెండో ఎస్సార్సీ వేయడం మంచిదంటూ ఆయన తన అభిప్రాయాన్ని ఆ పుస్తకంలో చెప్పారు. ఇప్పుడు అదే జరుగబోతుందనే సంతోషంతో ఆయన ఉన్నారట. ఇప్పుడు ఆయన మరేం అంచనాలతో పుస్తకాలు రాయబోతున్నారో చూడాలి.

Published On November 15, 2011